“لقيت الطبطبه” بين التريند والواقع ..
كتبت/ ساره جمال
تريند أغنية “بالبنط العريض” للفنان الجميل حسين الجسمي- وخاصة جملة “لقيت الطبطبه”- أثار العديد من الكوميكس بين جمهور السوشيال ميديا بين هؤلاء من وجدوا ” الطبطبه” ومن مازالوا يفتقدون هذه ” الطبطبه”.
الطبطبه – الكلمة العامية التى تحمل من المشاعر والمعانى ما عجزت عن حمله الكثير من كلمات الفصحى- تبعث فى نفوسنا الراحة والطمأنينة بمجرد سماعها أو التلفظ بها. فالطبطبة فعل صغير فى أداءه ، عظيم فى تأثيره ومداه ، فعندما كنا صغاراً كانت أمهاتنا تمنحنا هذا الشعور الرائع بالأمان عندما كنا نختبئ فى أحضانهن وهن “يطبطبن” على رؤسنا و أكتافنا بحنان.
الطبطبه كشعور معنوي هي إنك تحس بقلبي فتطبطب عليّا بقلبك، تحس بوجعي من قبل حتى ما يبان عليا وتفهم إيه اللي تاعبني. وطبعا عشان صعب نلاقي كدا- أو بمعنى أصح قليلين هما اللي بيعرفوا/عندهم القدرة على توصيل المشاعر دي- أصبح تريند “لقيت الطبطبه” متداول بشكل واسع بين الفكاهة والجدية بين رواد مواقع التواصل الاجتماعي.
أوقات الخيبات والفواجع والصدمات بنحتاج ايد تطبطب علينا بحب وحضن يخبينا من قسوة الحياة؛ لذلك في لمسه حنينه .. وفي نظره تحس انها بتحضنك .. وفي كلمه بتحس انها بتحتويك .. وفي حضن تحس انه جاي بعد تعب ووجع سنين عجاف .. وفي صمت تحس انه جاي وشايل كل الهموم وبيزرع مكانهم سلام وحب وطمأنينة.
الطبطبه مش شعور جسدي على قد ما هي حب ورعاية واهتمام وطمأنينة؛ قلب بيضمك من غير كلمة تجرحك وتقدير لكل تصرف يسعدك. لذلك مهما وصل الإنسان لنجاح في حياته أو حقق إنجازات مهمة، بيفضل جواه حته محتاجه سند وايد تطبطب أو حد يفهمه ويقوله انك مش لوحدك أنا هنا جنبك .. عايز يرجع بعد يوم منهك طويل مليان مشاكل يرمي نفسه ومشاكله في حضن اللي بيحبه.
و زي ما البشر بيطبطب علي بعضه، ربنا كمان بيبعت لنا رسايل “طبطبه” على قلوبنا، ممكن تبقى فى دعوه حلوه من حد ممكن منعرفهوش فى وقت وجع، او تبقى في أشاره بتقول ان اللى كنا فاكرين فيه الخير لينا مش كده ابداً، او فى رزق جديد فيه عوض عن اللى راح وفقدناه ، او فى احساس بالسكينة والرضا بكُل أقدارالله.
خلي طبطبتك على اللي بتحبهم اعتذار ليهم عن قسوة العالم وعن ندبات وأوجاع قلوبهم اللي ختمت عليها بالألم والذكريات السيئة. خلي طبطبتك تأكيد للحب الغير مشروط .. عطاء زي البحر يزيد ما بيقلش؛ فعلى قد ما بتاخد بتدي وما بتملش؛ لأن الطبطبه تساوي جرعة أمل وسط قسوة الحياة.
