فراق

شعر/أسماء طاحون
باختصار وجع الزمان انا عشته فيك
عااااارفه
هتقولولي بكره انسي ويمكن ابقي حد واعظ بحكي تجارب ومواعظ انه كله بيعدي ساعاات
انا عارفه مسيرها فتره وتعدي وعارفه اني لو مكنتش قد حملي عمر يوم ما كنت امر بيه
انا حافظه كل النصايح وعارفه اني لغيري ياما حكايات اصعب واصعب وبقوا اقوي من ال فات
بس كل حاجه توجع ولا تمس قلبي مهما كانت بسيطه ولا تافهه و عبيطه عندي انا مبتتنسيش!
لسه فاكره وجعي في كل جرح بسيط زمان …
جرحي من نظره بابايا كعقاب ولا ضربه خفيفه من مامتي بعتاب …يمكن لما شفت حريق جيرانا والضحايا وانهياري وقالو طفله وهتنسي كل شيء انا لسه حافظه التاريخ والميعاد وكل سنه دايما بتيجي بعيشه تاني بكل وجعه وآهاته …
انا عارفه اني اقوي واني هنسي ومش بعيد احب تاني !
بس للاسف الشديد عمري ما بنسي أبدااااااا وجع لقلبي حتي لو كان من بعييييد ….
اختزلت فيك كل المعاني واختزالي لكل شيء كان جرح ليا ..اختزالي للفرحه معاك خذلني (يمكن )..
واكتشفت اني بايديا بنيت في بيت ملوش اساس وجبت فيه اغلي الاثاث ضيعت فيه كل الفلوس وفلسي مش بس مال ده عمررري كله وايام صبايا وشبابي اتهدو فوقي وخرجت منه مش سليمه ده بعاهه دايمه ومستديمه طول الحياه !
مش مستحيل اظهر قويه وانصح في ديا واواسي ديا …
بس في علامه جوا قلبي مداريه وااااجعني لسه ..انا قلبي عمره ما كان بينسي اي جرح ولو كان بسيط …وجرحك انت عمره يوم ما كان بسيط ..
مش ذنبي ابدااا اني في يوم وثقت فيك وفتحت قلبي بعد قفله كل السنين وخوفي من كل حكايات المجروحين .. معرفش اني هنضم ليهم واسمع كلام انا ياما زمان قلته ليهم …
ولا اقولك الذنب ذنبي
ما انا بردو ساذجه وعبيطه !!