إنتِ بتحبيني ليه
بقلم / د . إسلام صابر
في البداية لازم نعرف إن الست طبيعة حبها للرجل مختلفة تماماً عن حب الرجل للست فحب الرجل للست هو حب يسمي بحب الأحتياج كما ذكر من قبل في مقالي السابق …. اما الست حبها للرجل حب أسمه حب أمــــــــان
عارف يعني ايه أمــــــان بالنسبة للست ؟
تعالوا مع بعض نعرض الامر بنطاق واسع شوية وبعد كده نتكلم عليه بشكل منفرد شوية،.
يعني لما تيجي تطلب منك طلب تطلبه وهي مش خايفة منك انك تزعق فيها او ترفض طلبها بأسلوب ما أو بأخر مهما كان بسيط او تافه من وجهة نظرك
يعني لما تقولك علشان خاطري تكون عارفه ومتأكدة انها ورطتك لأنك لايمكن ترفض طلبها لأنك مواصلها قد ايه خاطرها غالي عندك.
يعني لما تغلط ماتخفش وتيجي تحكيلك …. ولما تعمل حاجة جديدة تاخد رأيك فيها وهي واثقة انك مش هتبخل عليها بمشورتك ولا هتقلل من قيمة الشئ اللي هتاخد رأيك فيه ولو حتي بأنك بس هتسمعلها بشكل كويس ومش هتستهتر بكلامها أو تستهتر بالحاجه اللي هتاخد رأيك فيها .
يعني تكون اول واحد بترفع ثقتها بنفسها مش بس كده دي كمان مش بتحس بوجودها وكيانها وقيمتها غير معاك انت وبس.
يعني لما تنام وهي قاعدة من تعب اليوم تكون واثقة انك هتغطيها انك هَتسكت الكل عشان هي ترتاح لأن راحتها تهمك.
يعني لما تتعب تبقى عارفه ان حضنك مفتوحلها وانك وقت أزمتها هتقف جنبها حتى لو كنت زعلان منها ومش بتتكلم معاها.
يعني لما حد من أهلك يسألك مراتك عاملة ايه معاك هتقولها الحمد لله مبسوطين حتى لو فيه مشاكل بينكم وبين بعض.
يعني تكون صاحبها قبل حبيبها وحبيبها قبل جوزها وجوزها قبل ما تكون أبو أولادها وبتعرف توظف كل ده في الوقت اللي هي محتاجه في ده مش العكس،
تكون سندها وظهرها اللي بتتحامى فيه من الظروف والزمن والتحديات والاختبارات اللي بتقابلها في حياتها.
اللي أنا قولته ده كله عن الستات بشكل عام بنسبة كبيرة جدا
وده كله بيكون عندها بيسببلها الأمــــان لكن علي وجه الخصوص انا هتكلم عن الآمان من وجهة نظر الست ….. بمعني أدق هقول بعض العناصر اللي الست بتشوفها من وجهة نظرها لو مش موجودة عند الراجل بتفقد عنصر الأمان اللي من خلاله بتفقد عنصر الحب
في ست الامان عندها آمان مادي تحب الراجل عشان معاه فلوس دي وجهة نظرها في الأمان واول ماتخلص الفوس او تحصل أزمة مادية علي طول تلاقي تشتت في العلاقة بينهم والآمان او بمعني تاني الحب بيخلص أو بيتأزم مع الآزمة المادية … لأنها فقدت أهم عنصر اتأسس عليه العلاقة وبالتالي الأساس لما بيتهد العلاقة بتتأثر وقد تنهار مع الوقت إلا إذا تم معالجة الأمر سريعاً
وفي ست تانية الآمان بالنسبالها هو ان الراجل اللي هتحبه او هتحس معاه بالآمان هو شخص بار بوالديه بيتعامل معاهم برفق و ود ومن هنا بيجي الحب المرتبط بالآمان لأنها في الوقت بتحس انها هتتعامل برفق وود مثل الوالدين ولما معاملته بتتغير مع الوالدين بتفقد الآمان وبالتالي بتفقد الحب مع الوقت .
وفي ست حبها وآمانها بيكون مع شخص بيعرف يقول كلام حلو وبيغازلها دايماً … وست تانيه امانها بيكون مع شخص بيعطيها وضعها في حياته وبيحسسها بقيمتها ..
وست امانها مع شخص حلو شكلاً وجسماناً … وحد تاني الامان عندها بيكون انه يعامله كصديقة قبل حبيبة …
وحد تاني عايزة الآمان يكون مع راجل ذات قيمة في المجتمع وشخصية مرموقة …. وست تانيه أمانها كله في راجل يعطيها حريتها ومايكونش قافل عليها …..وفي طبعاً أسباب تانية كتير جدا
كل ما عرضناه سابقاً عبارة عن أمثلة للأمان ولكن هناك انواع كثيرة وكثيرة ولكن تختلف من ست لأخري علي حسب وجهة نظرها للأمان …..والأسباب اللي ذكرناها كلها إذا حدث فيها أي خلل مع الوقت العلاقه بتتأثر وبيحصل فيها خلال
عشان كده انا بنصح كل رجل يسأل حبيبته او زوجته
إنتي بتحبيني ليه؟
وبنصح كل ست انها تجاوب على السؤال بمنتهي الصدق والامانة عشان الرجل يحاول يحافظ علي عنصر الأمان بالنسبالك عشان تفضل بينكم العلاقة منتظمة وغير متوترة بسبب فقدان الآمان المرتبط بالحب
حب الست للراجل حب أمان،
فعليكِ ياسيدتي أن تتقني في أختيارك لعنصر الأمان العنصر الجوهري عند الرجل اختاري عنصر الامان الشبه دائم عند الرجل الذي تختارينه شريك لحياتك وأمانك في الدنيا ..
