مصر في صوره

كتب/محمد فتحي

أسمع منى يا ولدى الحكاية
متخليش حد يكدب عليك
فى الصورة أعظم عبرة و أية
أتفرج و شوف و ملى عينيك

فى الصورة اللى شايفينها
أجمل معانى الأنسااااانية
صورة مصر اللى عارفينها
اللى فيها المحبة الربانية

صورة بألف رسالة و معنى
جواها مشاعر و كلام كتير
صورة مصر اللى بتجمعنا
فى حبها بحضنها الكبير

أبونا عايز يعدى الطريق
ربنا راح بعتله اللى يعديه
مسابهوش فى زنقة و ضيق
بعتله اللى ماسكين فى أيديه

بنته بالنقاب على يمينه
أختها بالطرحة على شماله
محدش منهم بص لدينه
البصة كانت على سنه و حاله

عارف مصر ليه متصانة
شايف الصورة فى الشارع
المحبة أجمل دليل و حصانة
نابعة من الكنيسة و الجامع

أبونا و أم طرحة و أم نقاب
قالوها للدنيا و كل العالم
وصلوا رسالة لكل الأغراب
إننا كلنا أنسان بنى أدم

الدين هيفضل لله
إنما الفتنة متساويش
الأنسانية أجمل حياة
فيها الأنسان يعيش