بقلم / اكرام سليم
حروف إسمك
شرف ليا
في كل مكان
علي جبيني
شموس
بتنور الدنيا
ضيا وبهاء
وفوق الراس
انا شيلاك
ومهما تعبت
اقول بردو
انا عاشقاك
حروف اسمك
بتعشقني
وانا العاشقة
ها ألضمها
وهجدلها
ضفاير
حلم ف اللفة
مبكبرشي !!!
و هشغلها
عقود وتيجان
وههديها
عروس البحر
واهديها
ملوك الجان
حروف إسمك
بوشم الحنة
فوق يدي
وع الفستان
و ف الكردان
حروف اسمك
شبك صياد
في بحر هواك
انا المتصاد
وليه الحلم بيعاند ؟
وليه ياعناد
في كل مرة
بتعاود ؟
وتبنيلي
جسور الوهم ؟
عمدانها
آيات الخوف
والرهبه
وتحت اسوارها
تدفني
بتحييني
وتقتلني
ناديلي
مد لي
ايدك
كفايه تعبت
م الترحال
عليك الله
ياوطني
متخسرنيش
عليك الله
ياوطني
متخزلنيش
ومتبعنيش
للشارع
وللسكة
وللغربة
وللأعداء !!!
دا انا صابرة
علي وجعك
تروح ايام
وتيجي ايام
وانا الغلبان
ماليش حيلة
غناوي الصبر
هربانة
وانا اليأسانة
من ذلي
علي اعتابك
الف بلاد وارجعلك
الاقي الغلب
مستني
ياخدني ف حضنه
يسقيني
مرار الصبر
من تاني
وآاااااه منك يابيعاني
د انا عاشقة تراب ارضك
واموت ع العهد
اصون عرضك ….
