غير مصنف

《مشتاق لأحضانك يابهية》

《مشتاق لأحضانك يابهية》
كلمات**الشاعر الغنائي**

السيد العطار….
وحشوني كتير أمي وأبويا

والراحه الكامله في أحضانهم
ووحشني هزار أختي وأخويا

والضحكة الحلوه وأفعالهم
ياسلام ياسلام علي لمتنا

والقاعدة الرايقه قصاد بتنا
كان في جميزة وضليله
ب ضلل علي كل حارتنا

……..
وحشتني الحارة بما فيها
والناس الحلوه الفض فاضه

انا مهما هقول وأحكي عليها
الناس دي جميله ووداده

وحشتني الحاره بأكملها
صبان وبنات حتي عيالها

وحشتني ألعابنا البدائية
السيجه ياناس والسقاطه
…………
وحشتني أيام الإعدادي

وزمايل التخته المثاليه
أحمد أبو أمين .محمود موسي
وولاء ..وأبوذيد ..العسليه

الجيل دا كان كله مميز
لا بيعرف غيرة ولا تحيز

والفضل دا يرجع لمديرنا
وأبونا …. الأستاذ عطيه

علمنا إزاي نبقي كوادر
ونشرف أبونا وبلادنا

والشاطر بيحب الشاطر
وعلمنا المبداء لو لادنا

إزاي تتعلم وت كافح
وتكون إنسان فعلا ناجح

أخلاقك هي ميزان عقلك
ودا مبدأ أبونا وأجدادنا
…………….
وحشتني عدتنا وتقاليدنا
وأغاني تراثنا العاميه

أهو جالك أهو ريح بالك
ماتروشوا الشارع بقا ميه

أيام كان فيها الخير كله
كان كله بيعطف علي كله

إحساس ومشاعر ولا أروع
في أغاني زمان العاطفيه
…………..
وحشتني الشله وشقوتها
والسهرة لحد الصوبحيه

نضحك ونهزر ونكرر
ويا محلي عيشة العزوبيه

بإشارة كنا بنتجمع
في ثواني والكل ملمع

ومثبثب شعروا علي ناحيه
واللاثه شكل الجلابيه

أصحاب ع الحلوة وع المرة
ولا شئ في الدنيا بيبعدنا

وإن ميل فينا في يوم واحد
بنشيلوا بهمت سواعدنا

كان لسه الحب ياناس أخضر
والقلب شباب والعود أخضر

والنيه الصافيه في خطاوينا
والصدق منور سكتنا
………………
وحشوني زمايل الثانويه
أحمد…..والعسوي…..والبدري

والبنت ثنيه الحشريه
انا كنت بشوفها أطلع أجري

من كتر ماكانت بتهزر
من كتر الضحك أبقي مفرفر

مش قادر أصلب أنا طولي
من حيث لا أعلم ولا أدري

ووحشني كتير فعلا جدا
أبو صابر الشهم الغالي

الراجل السند المجدع
ولا ثنيه بتروح من بالي

أيامنا الحلوة انت فاهمني
ويارب يعينك ويعيني

ونتقابل علي خير يا حبيبي
وأحكيلك كل اللي جرى لي
……………
وحشتني القاعدة علي الترعه

تحت الصفصاف وقت العصريه
والشمس الدافيه والخضرة

والورد العايم علي وش الميه
وحشتني اللمه وأحبابي
وجيراني وكل أصحابي

في الغربه أنا بكتم في عذابي
ومشتاق لأحضانك يابهيه

مشتاق لأحضانك يابهيه
مشتاق لمصر الحنيه
……..
وحشتني الخاله أمونه
وحشتني العمه سعديه

وبنت الجيران اللي خطيبها
وحشتني عنيها العسليه

ووحشني ياناس الخال صالح
والخال محجوب كان صالح

والخال سيد كان سيد
وولادة كلها عشريه
والحسن العم دا كان طيب

والخاله زينب كوميديه
والجمل الجبل أبو السعود

كان رمز العيله وعموديه
وأبويا وأمي دول حاله

يتكرروا تاني إستحاله
والخاله عواطف دي قصه

بأمانه وزيرة الحنيه

《مشتاق لأحضانك يابهية》

اظهر المزيد

مقالات ذات صلة

اترك رد

زر الذهاب إلى الأعلى