بحور الشعر تشجيني
بقلم ..مصطفى سبتة
مليش في الشعر والابيات
ولا لحن قصيده ولا بحورها
مليش في فرحة البدايات
ولا نهايه بتدور علي دورها
انا يدوب حروف بتبات
تنادي في عتمة الاحلام نورها
مليش في الوزن والتفاعيل
مليش في العين ان قالت ليل
ولو طلع في الكلام مواويل
اكيد هتميل الكلمه علي جذورها
معروف اصل الكلام والفصل
ولا لينا في التقليد واحنا الاصل
وياريتنا بالقصايد نولنا الوصل
يا بلاد بعيده ومعلين سورها
مليش في القهر ولا احساسه
ولا بيعته ولا اشتريت ناسه
وحداني وحنين قلبي وناسه
وعقلي في راسي بيوزنها
وطول ليله شوقي مخاويني
واخدني معاه وبناره كاويني
وانا سنيني قصاد عيني
بتفصل همومي علي دموعها
يا حروف عاصيه وعاصياني
البحور قاسيه وحارماني
وعلي شطوط هواكي حِرماني
ولا رماني الحب في اعصارها
مليش في الشعر اي قصيده
مع ان الهوى حكايات بتتغنى
وانا عمري عدا ولا استنى
ولا شاف دمعتي سعيده
ولا سألها ولا م الخدود شالها
وسابها غرقانه في انهارها
ومن جنبها اهو مر وفات
دي حبيبها هو اللي خذلها
مليش في الشعر والابيات
ولا تبات حروفي في اوجاعها
ولا تشهد علينا في الروايات
بحور الشعر وكل أشعارها
