تقدمه / هبة صالح
المقادير
نص كيلو لحمة مفرومة
نص كوب فول صويا منقوع ومتصفي كويس
٣ بصلات مفرومين ونشوحهم علي النار لحد ما يصفر
كيس خلطة البرجر من ماجي
الطريقة
هنقلب كل المكونات دي مع بعض كويس وبعدين نشكل البرجر بغطا برطمان هنجيب الغطا ونحط عليه كيس بلاستيك ونشكل عليه
نحط قطع البرجر في طبق وبينهم ورق أبيض و كيس بلاستيك وندخلهم الفريزر
نعمل الصوص
٢ معلقة كبيرة مايونيز
ربع كوب لبن
٢ معلقة كبيرة مستردة
٣ معلقة كبيرة باربيكيو
نص معلقة دبس رمان أو صويا صوص وممكن الاستغناء عنها
رشة فلفل أسود
ونقلب كله مع بعضه كويس جدا وتوضع في التلاجة
صوص الجبنة
نص كوب لبن
معلقة ممسوحة دقيق
٣ قطع جبنه مثلثات
شريحتين جبنة شيدر
شريحتين جبنة رومي
شوية جبنة موتزاريلا
وأي جبن موجودة عندك حطي ماعدا الجبنة البيضا والقريش طبعا
وممكن جدا تكتفي بنوع جبنة واحد علي فكرة بس كل ما تحطي جبنة كل ما كان طعمها أحلى
هنقلب كل ده كويس لحد ما الدقيق يدوب خالص وبعدين حطي على النار لحد ما الجبن تسيح والقوام يتقل نحط عليها معلقتين مستردة ونقلب ونهدي النار خااااالص عليها
نقطع
طماطم
بصل
خيار مخلل
خس كابوتشا
كده بقت كل حاجه جاهزة
نشوي البرجر في طاسة تيفال بنقطة زيت
وبعدين نجيب العيش الكيزر
نحط الخس والخيار المخلل وبعدين البرجر وبعدين الطماطم والبصل وبعدين الصوص المدخن وبعدين صوص الجبنة
