تقدمه / هبة صالح
المقادير
ثمرة قلقاس حوالى كيلو بنشترى أى كمية ثمرة على بعضها أفضل عشان التسوية تبقى واحدة مفيش ثمرة تستوى قبل التانية
ربطة كسبرة خضرة
3 ربطة سلق اخضر
رأس ثوم مقشرة
شوربة لحمة او فراخ حوالى 3 كوب
زيت وملعقتين سمنة او زبدة
عصير ليمونة
الطريقة
نقشر القلقاس فى طريقتين ممكن نقسم القلقاسة لو كبيرة نصفين او على اربعة اجزاء ونقشر كل جزء لوحدة لسهولة تقشيرها وممكن نقشرها قبل التقطيع
بعد التقشير تقطع مكعبات متساوية وصغيرة
ثم يغسل بماء ساخن حتى تصب الماء اللى نازلة منه صافيه ونعصر عليه عصرة ليمونة ونتركه يصفى
يتم أخذ أوراق الكسبرة فقط نقطفها زى الملوخية بدون عيدان ونغسلها كويس
السلق أيضا بنقطف أوراقه بدون العيدان ونغسله كويس أوى ونقطعه قطع صغيرة
نأخد نص كمية الكسبرة نضعها مع السلق والنصف الأخر نفرمه مع التوم فى الهون أو الكبة
نضع مقلاة واسعة على النار ونضع بها 2 ملعقة زيت ونتركه يسخن ثم نضع عليه السلق المخلوط بالكسبرة بعد تصفيته من الماء ونحمره على نار متوسطة مع التقليب المستمر حتى يتغير لونه للون الاخضر الغامق جدا ثم يدق بالهون او نفرمه بالكبه
فى هذه الأثناء نغلى الشوربة على النار وأول ما تغلى نضع القلقاس وملعقة صغيرة من دقة الثوم بالكسبرة ونترك باقى كمية التوم جانبا
ونتركه القلقاس ينضج مش هياخد وقت نجرب نطلع واحدة بالملعقة ونضغط عليها لو استوت نطفى عليه النار
نرجع للسلق اللى اتحمر وفرمناه بالكبة أو الهون بعد التحمير حتى يصبح ناعم
نضع على القلقاس يأخد غلوة واحدة حتى لا يتهرى القلقاس وحتى يندمج مع القلقاس
فى نفس المقلاة نضع ملعقة سمنة وملعقة زيت ونحمر فيه باقى دقة التوم بالكسبرة ونضعها على القلقاس زى الملوخية وألف هنا
ممكن نضع بالشوربة أثناء التسوية اللحمة لو هى شوربة لحمة أما لو فراخ هنحمر الفراخ ولا توضع به تقدم محمرة
ملحوظة
فى ناس بتقطعه وتمسحه بمنديل ومش بتغسله تمام عادى بردوا بس الأفضل غسله أما لو هتخزينيه بالفريزر يبقى ممنوع غسله يتقطع ويوضع بأكياس نى بالفريزر وتطلعيه على الصيف إن شاء الله
لو هتستعملى أى نوع مجمد هنغلى شوربة ونكون محضرين توم وربطة كسبرة خضرة مغسولة ومتقطعة وندقها او نفرمها هى والتوم ونضع القلقاس بالشوربة وتكون الشوربة يدوبك مغطية القلقاس بسيط اول ما يستوى نضع الكيس المجمد الخاص بالسلق الموجود مع القلقاس يغلى غلوة معاه ونجفى النار ونحمر الكسبرة والتوم المفرومين ونضعهم على القلقاس وبالهنا
