أسنان الطفل بتتكون و هو لسة جنين في بطن أمه يبقى أول خطوة للإهتمام بأسنان الطفل هى إن الأم تتغذى كويس و تهتم بشرب اللبن و تأخد الكالسيوم اللي بيكتبه لها الدكتور من أول الشهر الرابع. معظم الأمهات اللي بيشتكوا إن أطفالهم متأخرين في التسنين بتلاقيهم كانوا مقصرين في الإهتمام بمنتجات الألبان أثناء الحمل، أينعم كدة كدة الطفل بيسحب احتياجاته من جسم الأم لكن تقصيرها في التغذية هيخليه مايسحبش احتياجاته كاملة….عزيزتي الأم اتغذي أنت بتاكلي لإتنين
بعد ولادة الطفل عشان نهتم بأسنانه لازم نلتزم بحاجتين: الأولى هى النظافة…و التانية هى التغذية و إستخدام فيتامينات معينة….و قبل مانتكلم عن الحاجتين دول بالتفصيل خلينا الأول نتكلم بالتفصيل عن التسنين؛
الطفل بيبدأ يسنن على ال6 شهور لكن لو اتأخر عن كدة شوية مانقلقش بشرط إن يكون حركة الطفل طبيعية و مناسبة لسنه؛ يعني لو مثلا عندنا طفل عنده 9 شهور ماسننش لكن بيقعد صالب ظهره كويس لوحده من غير مايكون مسنود يبقى مفيش مشكلة، نراعي إننا نودي الطفل لمواعيد المتابعة بتاعته مع دكتور الأطفال اللي بيطمنا فيها على الطول و الوزن و قياس محيط الرأس و الحركة و كدة…أما التسنين فله range و هتلاقوا في الصورة صورة لrange مواعيد التسنين و التبديل يا ريت الآباء و الأمهات اللي عندهم بيبي ينزلوها عندهم.
قبل ما الطفل يسنن بحوالي شهرين أو أكتر بتظهر عليه علامات بتنبه الأم إن الطفل بيسنن؛ زي إنه يحط إيده في بقه أو يبتدي يعض و هو بيرضع، و يبتدي الdrooling أو بالبلدي كدة يريل و يغرق دقنه باللعاب، ده غير القريفة و العياط و فقدان الشهية و اضطراب النوم…أكتر حاجة تقدر الأم تساعد بيها طفلها في المرحلة دي إنها تديله “عضاضة” و ممكن تبل قماشة نظيفة بماية يكون سبق غليها و تبريدها و تمسح بالقماشة دي على اللثة….في أضيق الحدود لو الطفل مش قادر ينام و باين عليه إن ده من ألم التسنين ممكن الأم تديه من المسكن الخصوص للرضع اللي كاتبه له الدكتور….لكن ممنوع ممنوع ممنوع إنها تدهن له “جل” اللي منتشر في السوق و بيتقال عليه إنه للتسنين لأن ده كارثي و في منتهى الخطورة؛ الFDA أصدرت بيان بتحذر فيه من استخدام الجل المسكن نظرا إن مادة الليدوكين اللي فيه عند البلع ممكن تسبب مشاكل في المخ و القلب بالإضافة إنه بيخدر الحلق و ممكن الطفل يبلع أي حاجة و هو مش حاسس بحلقه و تخنقه لا قدر الله…خليكي في العضاضة و مرحلة و تعدي إن شاء الله
غلطة تانية بيعملها قلة مندسة من أطباء الأطفال و هى إن لما أم تشتكي له إن فيه سنة ماطلعتش يقوم يقول إنه “هيشق لها” و ساعتها بيروح جايب tongue depressor اللي هو خافض اللسان و يقوم كاحت اللثة اللي فوق السنة طبعا دي غلطة و جريمة؛ خافض اللسان ده معمول من الخشب و مش معقم اساسا و مش معمول أبدا لأي تدخلات جراحية، ده كل وظيفته في الحياه إن الدكتور ينزل به اللسان عشان يعرف يشوف اللوز، بس كدة…الكحت به بالشكل ده بيعرض الطفل لجروح و جراثيم مالهاش لازمة و عيب لما دكتور مايبقاش عارف كدة أو عارف و مش مهتم….زمان في حالات معينة كان أطباء الأسنان بيدوا للطفل بنج و يستخدموا أدوات معقمة معينة لعمل شق في لثة مستعصية لكن التكنيك ده بطل من سنين و ماحدش بيلجأ له دلوقتي نهائي….دلوقتي بنشدد على الفيتامينات و التغذية و العضاضة…و ممكن تسيبي الملعقة البلاستيك اللي الطفل بياكل بيها معاه شوية بعد الأكل يعضض فيها شوية…و ممكن تديله بقسماط أو جزرة أو أي حاجة ناشفة شوية يعضض فيها و هى هتكحت في اللثة بس بالتدريج و من غير أذى…فياريت دكتور الأطفال اللي بيعمل كدة يبطل عشان حرام و عيب، و ياريت لكل أم لو الدكتور قال لك إنه هيعمل كدة ارفضي و غيري الدكتور.
زي ماقلنا في الأول إن الاهتمام بأسنان الطفل عبارة عن اهتمام بالنظافة و التغذية و فيتامينات معينة…خلينا نمسكهم واحدة واحدة، أول حاجة النظافة؛ أول ماعلامات التسنين تبدأ و زي ماقلنا إنها بتسبق ظهور السنة بشهرين أو أكتر لازم تبدأ الأم بتنظيف فم الطفل بعد الرضاعة و قبل النوم…طب تنظفه بإيه؟هنا فيه اختيارات؛ اختيار منهم إنها تستعمل صباع السيليكون و ده بيبقى حاجة صغيرة بتتلبس في صباع الأم و الشعيرات بتاعت الصباع ده بتبقى مصنوعة من السيليكون، بس لازم يتغسل بعد الاستخدام و يتعقم قبل الإستخدام بإنه يتحط في ماية مغلية لمدة 3 دقائق (نركز إننا بعد مانغلي الماية نطفي النار قبل مانعقم الحاجة اللي بتحتاج تعقيم من أدوات البيبي ماينفعش نحطها و النار شغالة)
اختيار تاني بديل و هو إن الأم تستعمل الشاش العادي اللي بيتباع في الصيدليات و ده بيبقى نظيف، و الطريقة إن الأم كل مرة تقطع قطعة جديدة و تلفها على صباعها و تبلها بماية نظيفة (زي ماقلنا اللي سبق غليها و تبريدها) و تنظف اللثة و لسان الطفل….تستمر الأم على الحال ده لحد ما أول سنة تطلع، ممكن تستمر على إستخدام الشاش و الماية لحد ماكل الأسنان الأمامية تظهر و ممكن برضو أنها تبدأ بإستخدام فرشاة أسنان الرضع المخصوصة اللي بيبقى مكتوب عليها من 4 شهور لسنتين، هنا ناخد بالنا إن الأم لسة عندها اختيارات لكن أول ما أول ضرس يطلع و ده بيبقى تقريبا على عمر سنة و 3 شهور مابيبقاش فيه اختيارات؛ بيتبقى استخدام فرشاة أسنان البيبي بس، و نخلي بالنا تاني إنه بيبقى مكتوب عليها من 4 شهور لأنها مختلفة عن فرشاة الأطفال اللي أكبر من سنتين…..تستخدم الأم للتنظيف فرشاة الاسنان و ماية نظيفة فقط لحد عمر 3 سنوات و بعد العمر ده ممكن تبدأ تستخدم معجون الأطفال…طب ليه بنخاف من المعجون قبل 3 سنين؟ أولا عشان الطفل مابيعرفش يمضمض قبل السن ده و هيبلعه والمعجون بيبقى مليان مواد حافظة ضارة لو اتبلعت و كمان الفلورايد اللي في المعجون لو زاد عن جرعات معينة بيبقى سام…طيب لو طفل تحت ال3 سنين بياكل شيكولاتات و سكريات كتير و الأم اضطرت تستخدم معجون؟ يبقى لو مفيش إمكانية إن حد راجع من السفر من برة مصر يجيبلها معجون للرضع خالي من المواد الحافظة و الفلورايد ممكن تستعمل لحسة صغيرة قد السمسم من معجون أعشاب خالي من الفلورايد أو معجون أطفال بس ضروري تلف على صباعها قماش و تبله بماية و تمسح كل آثار المعجون من أسنان الطفل و فمه عشان مايبلعوش.
الكلام اللي هقوله دلوقتي موجه للأمهات اللي أطفالهم بيرضعوا صناعي، من فضلك إوعي تسيبي ببرونة في فم طفلك بالساعات بالليل لأن هى دي اللي بتعمل تسوس الرضاعة أو اللي بنسميه Nursing caries أو Baby bottle caries أمهات كتير و هما بيدوا الطفل الرضعة بتاعت بالليل بيسيبوا الببرونة بالساعات في فم الطفل، و فيه أمهات بيعملوا غلطة شنيعة و يحطوا في الببرونة عصير عشان يريحوا نفسهم من رضعة بالليل أو تكون بتمهد لفطام و الطريقة دي كارثة يا ريت ماتتعملش…لو هتدي الطفل اللي بيرضع صناعي رضعة بالليل يا ريت تبقي فايقة و بعد مايخلصها نظفي فمه بالطرق اللي ذكرناها فوق….لكن لو الأم بترضع طبيعي فهي مش مضطرة تعمل كدة؛ سبحان الله لبن الأم مابيعملش تسوس في الأسنان نهائي ، حتى لو قعدت طول الليل ترضع والا يهمها.
ندخل بقى على التغذية و الفيتامينات؛ قبل ال6 شهور الطفل مش المفروض ياكل لكن لازم ياخد أنواع معينة من الفيتامينات…الفيتامين اللي يخصنا هنا هو فيتامين دي أو المعروف في السوق باسم vidrop و هنا هتلاقي اختلاف في آراء الدكاترة؛ فيه منهم اللي بيوصي بالفيدروب من أول يوم ولادة و فيه منهم اللي بيوصي به عند عمر الشهرين….أنا عن نفسي بأفضل المدرسة التانية اللي بتقول من أول الشهرين لأن الطفل بعد 3 أيام من الولادة بيجي له حاجة اسمها “الصفراء الفيسيولوجية” و من ضمن العلاج بياخد مجموعة من الفيتامينات معروفة في السوق باسم Bebe vit و دي بتساعد في التخلص من البيليروبين بتاع الصفرا و تنزله في الستول و من ضمن الفيتامينات دي موجود الفيتامين دي، الأطفال بيستمروا على البيبي فيت ده لمدة شهرين و بعد مايوقفوا ممكن عادي نبدأ الفيدروب. جرعة الفيدروب بتبقى 4 نقط في اليوم قبل عمر السنة و 6 نقط في اليوم بعد السنة…..طب بالنسبة للكالسيوم؟ لأ ده فيه محاذير؛ ممنوع منعا باتا طفل ياخد كالسيوم من غير تحليل دم و من غير مراجعة طبيب الأطفال.
طب بالنسبة للأكل؟ على ال6 شهور الطفل بيبدأ ياكل لكن ممنوع تماما منتجات الألبان قبل عمر السنة…دايما بيبقى فيه خلاف في الآراء حول الزبادي على أساس إن تركيبتها مختلفة لكن خلينا في السليم و نمنعها لحد السنة، و على فكرة مش الألبان بس اللي فيها كالسيوم، فيه برضو أكلات كتير غنية بالكالسيوم؛ على ال7 شهور ممكن تدي الطفل صفار البيض المسلوق و طبعا عشان الطفل يعرف يبلعه من غير مايشرق يفضل إنه يذاب في شوربة الخضار أو السيريلاك……بعد عمر السنة إديله بقى كل منتجات الألبان و انتي مطمئنة طالما مفيش عندكم في العائلة تاريخ لحساسية الألبان.
طب عندنا طفل رزيل قارفنا في الأكل، الحل تماما في إيد الأم؛ لو الطفل شافك متوترة و ملهوفة عليه و بأن على وشك إنك قلقانة لأنه مأكلش هيفرح قوي إنه حاز على اهتمامك فهيسوق فيها و يتمادى في العند…..حاولي تتمالكي أعصابك و اظهري البرود، أكل أكل…ما أكلش عادي شيلي الأكل و ارجعي اعزمي عليه تاني….ما أكلش اقعدوا كلوا و خلوه يتفرج عليكوا ساعتها هياكل….فيه أطفال بتحب تاكل و هى بتلعب…و في طفل بيحب ياكل و هو سامع دوشة الغسالة والا المكنسة…الأطفال يجننوا فخليكي أجن منهم و تقبلي تصرفاتهم طب لو طفل مش عاجبه نوع الأكل؟ والا يهمك وقفيه و ارجعي إديهوله تاني بعد اسبوعين تلاتة ….مابيحبش اللبن ولا البيض إعمليهم في كيكة أو كريب…حطي في السلطة بروكلي و ده غني بالكالسيوم….خبي اللبن في مكرونة بالبشاميل، و السمك ممكن يتعمل كفتة….في الأكل فيه أطفال بيضطروا أمهاتهم يعملوا شقلبظات و يتشقلبوا في الهوا عادي اصبري و طولي بالك و اتشقلبي المهم ماتيأسيش.
أهم حاجة جنب كل ده ماننساش تعريض الطفل لأشعة الشمس الحلوة و دي بتبقى موجودة يا إما من الصبح بدري لحد الساعة 10 صباحا أو من بعد العصر لحد المغرب، و إبعدوهم تماما عن شمس الظهر اللي بعد الساعة 10 لقبل العصر لأنها ضارة جدااااا.
عزيزتي الأم الأمومة مش سهلة بس مستاهلة، هتاخد منك مجهود بس ولادك يستاهلوا و الجزاء كمان يستاهل….لو لاقيتي مقاومة من طفلك و انتي بتغسلي أسنانه ده طبيعي قاوميه و اغسلي له بالعافية زي مابيطلع عينك و انتي بتغيري له البامبرز….تكتفيه و أنتي بتغسلي له أرحم مليون مرة ماتكتفيه عند دكتور الأسنان…… أنتي في المرحلة دي بتغسلي له أسنانه بكرة يكبر و يغسلها بنفسه إن شاء الله….و لما يكبر و يفهم على المعروف ده بالذات هيبوس رجليكي.
الحفاظ على الأسنان مش صعب و مش مكلف؛ يدوب فرشاة و تحمي طفلك من التسوس، و لما يكبر إن شاء الله هيلتزم بيهم و هيرحم نفسه و جيوبه من تكاليف علاج الأسنان الباهظة.
