بقلم / د تامر أحمد
عزيزي القارئ
عايزك تغمض عينيك و تتخيل معايا انك مسافر لمدة سنة بتحضر شنطة السفر و بتحاول تاخد معاك الحاجات الأساسية و المهمة ، خاصة ان شركة الطيران بتسمح بشنطة واحدة بس ، و بالتالي بتحاول ترتب اولوياتك تاخد ايه و تسيب ايه .
فجأة بيقطع تركيزك جرس الباب ، بتفتح تلاقي زيارة مفاجأة من انسان سئ بمعنى الكلمة ،
انسان مالوش اي ذكرى إيجابية في حياتك بل بالعكس كل مواقفه السابقه معاك سلبيه جدا ..
طيب جاي ليه دلوقتي ! جاي علشان يسلم عليك يا اخي
طيب يا سيدي الله يسلمه ، لأ مش بس كده الحقيقة هو كمان جاي يطلب منك طلب ظريف زيه كده بالظبط
و هو انك تحط في شنطتك( اللي يدوبك مكفيه حاجاتك المهمة) صورة كبيرة بالبرواز ليه هو شخصيا عشان ما تنساهوش في السنه دي !
و سابلك الصورة و نزل ..
شوية و رن جرس الباب تاني و المرة دي فتحت لقيت انسان صاحب فضل عليك و كان ليه دور ايجابي في حياتك جاي برضه يسلم عليك قبل ما تسافر و الغريبة انه طلب منك نفس الطلب انك تحط في شنطتك صورة كبيرة بالبرواز له و برضه سابلك الصورة و نزل.
و بعد ما مشي انتهيت اخيرا من ترتيب شنطتك و اتأكدت انك اخدت الحاجات الأساسية كلها و فضل عندك مكان يكفي صورة واحدة بس ياترى حتاخد انهي صوره منهم .
الحقيقة ان السؤال ده يبدو اقرب للسذاجة و الإجابة عليه بديهية جدا و هي انك طبعا حتاخد صورة الانسان الكويس صاحب الفضل و الدور الايجابي في حياتك .
بس في الحقيقة مش دايما ده اللي بيحصل و لا دايما ده اللي احنا بنعمله في حياتنا.
و اسمحلي عزيزي القارئ اوضح وجهة نظري و ايه المقصود من القصه دي.
اما السفر لمدة سنة فهو رمز للسنة الجديدة اللي كلنا بنستعد علشان نبدأها و شنطة السفر هي الحاجات اللي انت بتختار تشيلها في عقلك و قلبك من السنة القديمة و تاخدها معاك للسنة الجديدة و بالنسبة بقى للشخص السئ فهو بيمثل كل الاشخاص و الذكريات السلبيه اللي حصلت معانا في السنة اللي فاتت و العكس صحيح بالنسبه للشخص الايجابي.
طيب جميل و المطلوب ايه ؟
المطلوب اننا نرتب نفسنا كويس و نستعد لبداية سنة جديدة و ما نسمحش للأشخاص و الأحداث السلبيه باحتلال مكان في سنة كمان من عمرنا ( سنتناالجديده ) و في نفس الوقت ما ننساش ابدا كل الاشخاص اللي لعبوا دور ايجابي في حياتنا في السنة اللي فاتت هم دول اللي يستحقوا بجد مكان في شنطتنا قصدي في حياتنا.
دلوقتي انا مش حعطلك و حسيبك ترتب شنطتك للسنة الجديدة و لو رن جرس الباب بص من العين السحرية قبل ما تفتح و لو طلع الشخص السئ ده ما تفتحلوش.
و قبل ما تسافر ما تنساش تقفل محبس الذكريات المؤلمة و تكلم كل من كان ليه دور ايجابي في حياتك و تقوله شكرا .
اتمنالك رحلة سعيدة ل ٢٠٢١
اللهم اجعل ٢٠٢١ عاما فيه يغاث الناس.
