كتبت / هبة صالح
حاسة ان علاقتي مع ابني بقت علاقة اني بأكل وبلبس وبقول أه أو لا أو بزعق أو بطنش أو بسكت أو بنيم
لما بشوف كلام بعض متخصصين التربية أو الصفحات المنتشرة عن التربية أو حتى صور بعض الأمهات مع أولادها بحس أني مش مبسوطة
بحس أني غيرانة أو زعلانة
بحس بضغط عليا
بحس أني مش الأم اللي عايزة أكونها مع ولادي
هما ليه علاقتهم حلوة بأولادهم .. هما ازاي مستمتعين بحياتهم .. هما مش عندهم مسؤليات زيي ولا إيه
قررت أني هخرج أنا والولاد ونتصور ونتبسط ..
اللي بيعيط واللي عايز ببي واللي مش راضي يأكل .. واللي عايز يلعب واللي مش عايز يقعد والخروجة قلبت بنكد
وبدل ما أنا خارجة اتبسط وافسحهم زعقت وبرقت وشديت وروحت تعبانة
ولسان حالي بيقول وايه لازمتها بقى ما كنت قعدت بيهم في البيت أحسن
دي مشكلة أمهات كتير بيقولوها بلسانهم أو بيحسوها ومش عايزين يقولوها
طيب الحل ايه ؟
أولا علشان تصلحي أو تبني علاقتك بابنك لازم تصلحي علاقتك بنفسك الأول
ازااااي ؟
1- كفاية إحساس بالتقصير
متقارنيش نفسك بحد
متقارنيش ولادك بولاد غيرك
متخدعكيش الصور ( لأنك شايفة صورة مش كاملة ) الحياة مش مجرد صور
متخصصين التربية بيغلطوا وبيزعقوا عادي جدا
أشهر كتب التربية اللي حققت أعلى أرقام بيع على مستوى العالم أصحابها ذكروا مواقف وتحديات قابلتهم مع أولادهم
2- أشكري نفسك على كونك أم بتفكر ازاي تكون أحسن
أشكري نفسك على كل المجهود اللي بتبذليه علشان تحققي كل اللي اولادك وصلوله وبقوا فيه
اكتبيي لنفسك النهاردة جواب شكر واشكريها على كل حاجة نجحت فيها وكل تحدي قابلته وعدت فيه
كافئي نفسك ولو بحاجة بسيطة تفرحي نفسك بيها وتصالحي نفسك بيها.
ندخل بقى على إزاي أصلح علاقتي بأبني ؟
أزاي ابني علاقة جيدة بيني وبين ابني ؟
فاكرة لما كان لسه في حضنك وانتي بترضعيه أو بتغيريله أو بتعملي حاجة محدش يقدر يعملها غيرك !
كنتي بتسيبي كل اللي في إيدك علشان عيط عايز يرضع
أو ده عايز يغيير أو عايزني أشيله .. فاكرة
هيا هيا نفس الفكرة
إنك تكوني موجودة بشكل حقيقي
وقت ما تكوني معاه تكوني في وضع ال BEING
نشرحها دي .
1- وقت التجمع :
في أوقات بنكون متجمعين فيها سوا .. ودي أوقات لطيفة جدا للأسرة إنهم يكونوا كلهم مع بعض
في الأوقات دي اسيب الموبايل .. اللاب توب .. التليفزيون ..التليفون أي مشتتات
طبعا في حالة أن ده وقت هنقعد فيه مع بعض وقت التجمع سواء وقت الغداء / العشا أو وقت خاص الأسرة بتقعد فيه مع بعض ..
مقصدش أن ده وقت شغلك وانتي محتاجة تكوني مركزة مقصدش أن ده الوقت الخاص بتاعك وانتي عايزة تقعدي شوية مع نفسك بتعملي أي حاجة ليكي .
2- الوقت المخصوص :
( متعامليش ولادك بالكبشة )
في أوقات بنكون متجمعين فيها سوا ودي أوقات لطيفة جدا للأسرة إنهم يكونوا كلهم مع بعض دي اللي اتكلمت عنها في رقم 1
مش كل طفل بيحب يتكلم أو يعبر عن مشاعره أو احتياجاته أو يتكلم براحته في وقت التجمع بس ممكن يرتاح أكتر لو قعدتوا مع بعض لوحدكم one to one time
هنا انتي محتاجة تخصصي لكل طفل من أولادك وقت خاص بيه هتعملي معاه حاجة هوا بيحبها الوقت ده انتي نفسك هتحبيه وهتلاقي علاقتك بابنك اتحولت واتغيرت تماما
هقولك أمثلة :
* في ولد بيحب يقف مع مامته في المطبخ .. استثمري الفكرة دي
واقفوا اعملوا حاجة مع بعض في المطبخ بيتزا كوكيز كيكة أي حاجة بتحبوها
* في ولد تاني بيحب الافلام .. نقوا فيلم واقعدوا اتفرجوا عليه سوا .. أو روحوا السينما سوا
* في ولد تالت سنه أصغر ممكن بقى ده نلعب سوا نشاط تلوين أو قص ولزق أو لعب بالمخدات أو زغزغة .. أو حدوتة أو قراءة قصة
* وممكن قبل ما ينام وتقعدوا تتكلموا شوية ( هو هيتكلم وانتي هتسمعي باهتمام )
3- تالت حاجة علشان تبني علاقة مع ابنك انك تتعلمي منه عنه
لما هتعملي رقم 2 هتعرفي كتير عنه من اهتماماته والحاجات اللي بيحبها
هتسمعي اللي يعجبك واللي مش هيعجبك
اعرفي أكتر واهتمي إنك تفهمي وتحسي وتقدري
بس افتكري أن مش ده وقت التعليم ..
ليه عملت كده وليه معملتش كده
وأنت غلط وانت المفروض
واسمع الكلام
اديله فرصة والوقت أنه يتكلم بدون متقاطعيه بتحذيرات وتنبيهات علشان ميبطلش يتكلم🚫
4- املى إبنك بالثقة بالتشجيع والمدح عن طريق ملاحظة نقاط قوته ومميزاته وامدحيها واثني عليها ..
يعني ( أنت بطلي وانت ممتاز واحسن ولد في الدنيا … فاكس مش هو ده المقصود)
اثني وشجعي السلوك في وقته
وااااو انت منظم نظمت ألعابك بطريقة حلوة أوي .
شكراااا إنك استأذنت قبل ما تستخدم أدواتي .
الله !!! أنت عملت بالمكعبات برج كبير ده حلو أوي أنت عملته ازاي ..
عززي وامدحي وعلي من إمكانياته ومميزاته … لأن إحنا في عالم بيشوف الوحش وبيعلق عليه
فاملي إبنك بالثقة اللي مهما عمل اللي حواليه ميقللش منه
5- خامس حاجة .. لو انتي أم لولد خليكي فاكرة أن تربية الولاد للأقوياء مش الضعفاء المحتاسين انتي بتربي راجل لبكرة .. هتقابلي تحديات كتير وأوقات صعبة كتير
وال 4 نقاط اللي فاتوا دول مش عصاية سحرية .. مش هتجربيهم مرة أو اتنين
ده أسلوب حياة
ممكن ميكونش سهل إنك تعملي كل ده مرة واحدة .. بس سهل إنك تبدأي بحاجة حاجة
وتستمري عليها
تستمري عليها
أيوة بقولك تستمري عليها
اللي بيبني وبيأسس بيت شوفوا بياخد وقت وأدوات وصبر أد ايه
أومال اللي بيبني راجل وبيبني جيل وبيبني مستقبل ويبني علاقة صحية قوية مع ابنه هياخد أد ايه !!؟؟
انا خلصت بس تربيتنا لأولادنا لسه رحلة مبتخلصش
