تخيل أنك ممكن تعرف من خلال لعب إبنك ان كان طبيعى أم لا

كتبت د/ إيمان السرياقوسى

من فضلك راقب إبنك وهو بيلعب

اللعب له أنواع عند الأطفال وممكن نقول عليها مراحل

تعالوا نشوف

المرحلة الأولى: مرحلة اللعب بلا هدف ..
وهنا بيبدأ الطفل أول ما يمسك اللعبة يحطها في بقه أو أنه يرمي اللعبه من أيده و يبصلها وهي بتقع على الأرض أو يخبط اللعب ببعض .. ..

في المرحلة دي الطفل أساسا مش بيكون عارف يلعب ازاي و كمان لا يدرك مفهوم اللعب .. و بيستمتع أكتر بالتفاعل مع الأشخاص زي اللى يعاكس أو يقوله بخ مثلا ..
هذه المرحلة تنتهي عند سن سنة و نص بالكتير ..
طيب لو استمرار لعب طفلك بنفس الطريقة دي بعد السن ده

حقولك أن ده مؤشر خطير جدا عن أن الطفل بيعاني من مشكلة ما ولازم حد يشوفه .. خصوصا لو متأخر في حاجات تانية زي الكلام أو المشي ..

المرحلة التانية: أو اللعب بالتقليد ..
التقليد هو أساس التعلم لأي كائن حي و اللي بعد كده خطوات بتتطوره تدريجيا بالمحاولة و الخطأ وده بيكون ممثل فى
لما يمسك التلفون و يحطو على ودنه او يمسك المكنسة يعمل نفسه بيكنس اوتلبس شوز ماما وتمسك شنطتها .. و دي أهم مرحلة في حياة الطفل .. ووصول إبنك للمرحلة دي معناه أنه مدرك للبيئة اللي حواليه .. عشان كده أوعي أبدا تزعقي لابنك لما يمسك موبايلك أو نضارتك أو يلبس جزمتك .. مهارة التقليد هي المهارة اللي هيتبنى عليها كل المهارات اللي هيكتسبها بعد كده ..وده تقريبا ولازم يكون تم إتقانه عند سن السنتين..

المرحلة الثالثة: اللعب التخيلي ..
وصول طفلك للمرحلة دي معناه معناه أنه أنتقل من مرحلة التقليد للتخيل و الابتكار .. و دي الحاجة اللي بتميز الإنسان عن سائر المخلوقات..
وهنا بتلاقيه يعمل بعض الحاجات زي أنها تأكل العروسة أو تسرح شعرها .. أو ننيمها أو تركبها العجلة بتاعتها و تمشي بيها .. .. و المفروض طفلك يكون اكتسب المهارة دي قبل سن السنتين و نص.

المرحلة الرابعة: اللعب التشاركي ..
في الثلاث مراحل السابقة نلاحظ حاجه مهمه جدا وهو ان الطفل مهتم جدا بلعبته و بس .. و مالوش علاقة بباقي الأطفال ..

لكن بعد كده الطفل عند سن السنتين إلى سن السنتين و نص بيبتدي يعرف ان فيه مخلوقات تانية في نفس سنه ممكن تشاركه اهتماماته و بتعرف تلعب زيه ..
فيبتدي. الاول يهتم و يتابعهم بيلعبو ازاي بس من غير ما يقرب..
و بعد كده يبدأ يجيب لعبته و يروح يلعب جنبهم من غير فعليا ما يشارك معاهم و هو ده اللى بنقول عليه اللعب المتوازي … لحد ما يوصل لمرحلة اللعب التشاركي .. وديه بقى بيكون فيها الطفل مهتم بالشخص اللي بيلعب معاه أكتر من اهتمامه باللعبة نفسها ..
وهنا نقدر نقول إن المرحلة دية هي أول تدريب على التعامل مع الغير مش بس كده ديه كمان المرحلة الأمثل اللي الطفل يروح فيها حضانة لأن قبل كده حتى لو راح قبل ما يكتسب المهارة ديه حنلاقيه هيقعد لوحده .
و غالبا الطفل بيكون جاهز لكده عند سن سنتين و نص ل 3 سنين ..

المرحلة الخامسة: مرحلة بيتعلم فيه الطفل مبدأ أنه يستنى دوره في اللعب و بيبتدي من بعد ال 3 سنين ..
فمتقعديش ياماما بقى تناهدي فيه و في نفسك قبل السن ده و تزعقيله عشان يستنى دوره في اللعب ..
هو  مش فاهم يعني إيه دور ..
و مش فاهم ليه أنتو عايزينه يبطل لعب لحد ما غيره يلعب و يخلص !!
ومن وجهة نظره بيقول إيه الظلم ده يا ناس ؟؟
عوزامى تتأكدى وترتاحى ديه حاجة هيتعلمها لوحده بعد كده.

المرحلة السادسة: و دي بتبتدي عند سن ٤ سنين
بتتكون فيها شخصيته الطفل و مفاهيمه و مبادؤه الشخصية و بيلعب بناء على الاساس ده ..
يعني إيه الكلام ده
يعنى اللي بيشوف عنف منزلي في البيت هيبقى معظم لعبه ضرب ..
اللي بيشوف مسلسلات و أفلام هيلعب عسكر و حرامية ..
اللي بيشوف ثورات هيهتف أو هيمسك بندقية يضرب بيها ..

أهمية المرحلة دي أنك بتقدر فيها تدرس نفسية الطفل و تاخد فكرة عن البيئة اللي عايش فيها ..
و تقدري إنتي كأم تتابعي الأطفال و تقيمي أن كان من المناسب إبنك يلعب معاهم ولا لا .. لأنهم في الوقت ده هيأثرو فيه بمفاهيمهم و هيأثر فيهم هو كمان.

المرحلة السابعة: مرحلة إختيار الأصدقاء ..
و دي بتبتدي عند سن الخمس سنين وبتكون فيها ملامح شخصيته إبنك تكونت و بتستمر معاه طول عمره ..

فالطفل بيبتدي يختار يصاحب اللي يرتاح له و يتناسب مع ميوله و شخصيته ..

أوعي بعد سن الخمس سنين تجبري طفلك أنه يلعب أو يصاحب طفل بعينه ..سيبه يصاحب اللي هو يرتاح له و تابعيه من بعيد ..
أنت دورك في الموضوع ده انتهى خلاص …
ممكن تبعديه عن حد معين لأي سبب .. بس خلاص مبقاش ينفع تختاري له صحابه ..