العناد المقصود هنا هو العناد الإيجابي القائم فقط على فكرة الرفض لعدم إدراك أبعاد الموقف أو أسبابه وعليه تم التوضيح في البوست على ما يجب القيام به .
اسمحولي أفكركوا بالصفة المظلومة
العناد.. العناد بتصنفوه على إنه صفة سلبية
العند مش طبع سلبي يا جماعة
لكن التعبير عن العناد بأسلوب خاطئ زي الصريخ أو المفردات غير المهذبة أو الدبدبة .. ده اللي غلط
لكن الطفل العنيد.. طفل فكر كتير .. طفل رافض يكون تابع
أحنا بنعيد تصحيح تعبيره عن الرفض أو عدم التقبل
التعبير بس.. لكن مينفعش نتضايق أو نرفض فكرة رفضه لموقف معين محتاج منكوا بس إنكوا تفهموه سبب قراركوا أو طلبكوا
طيب .. ولو رفض لإنه مش فاهم أبعاد الموضوع !!
ببساطة .. ليكوا طبعا مساحة القيادة . بس برده هنقول له السبب .
مثلا.. لازم ينقل من مدرسته لأنها أقل من المستوى اللي كنتوا منتظرينه على المستوى التربوي والتعليمي
هنا.. هيثور هيتعصب .
هتعملوا إيه !!
هتناقشي بهدوء مع والده أسباب قراركوا
بهدوووء قوي حازم ومع الوالد في نفس الجلسة..
ولو عبر وقاطعكوا وقفي الحوار لخروجه عن شكل الحوار المهذب
يبقى هنا يا جماعة الأولوية للأدب توقفي الكلام مع ذكر السبب .
ومترجعيش تتكلمي إلا لما يلتزم بطريقة حوار متحضرة مهذبة
وتبلغوه بأسبابكوا
ولو متفهمش الأسباب دي – وده غالبا اللي بيحصل نتيجة قلة الخبرة والسن – بتنهوا المناقشة باتخاذ القرار ده لأنكوا الأكثر معرفة بمصلحته. وبتوعدوه بأنكوا هتساعدوه بتقديم كل أشكال الدعم والتيسير علشان يعدي الفترة الأولى من انتقاله لمدرسة جديدة
ده كان مجرد مثل لإدارة الحوار مع طفل عنيد
هتلاحظوا إن التعامل مع الطفل العنيد بيعتمد على الثبات الانفعالي وحسن إدارة الموقف .
وقد إيه أنا بستغرب من الأم والأب اللي بيجولي مستنكرين من طريقة طفلهم السوقية في التعبير عن العند وهم أساس طريقتهم ف التعامل عصبية وزعيق وتهديد وأحيانا ضرب !!!
#البداية_عندكوا
