بقلم / داليا زردق
الإنفصال عن أي شيء في حياتنا محتاج تمهيد و تفكير طويل و إستعداد….
طبعا ساعات كتير من قوة الغضب و الحزن و الصدمة بناخد قرار بالرحيل و زي ما بيقول المثل عليا و علي أعدائي …
بدون ادني منطق وقتها ،،
فالغضب ممكن يخليك تحطم حاجات كتير مهمة بدون وعي تام منك ….
طيب إيه الحل لما نكون فعلا مش قادرين نستحمل شغل أو دراسة ما أو شريك حياة أو شريك سكن أو أي مكان في حياتنا ….؟!
هل نجبر نفسنا إننا نكمل و أهي عيشة و السلام !
و ألا نهد المعبد عاللي فيه !
و ألا نتجاهل التفكير أصلا من الأول و ندخل في مرحلة كبت نفسي و ضغط عصبي و ضغط عالي و هكذا ،،!
عزيزي القاريء…
عمر الحياة ما كانت سهلة بسيطة … عمر أحلامنا ما حتتحقق زي ما حلمناها و القصة تكمل و توته توته فرغت الحدوتة حلوة و الا ملتوته!
لا … الحياة سلك شائك…ملفوف حوالينا..
و الشاطر بس بيعرف يمر من جنبه بدون ما يلمسه…
بدون ما يجري عليه بكل قوته و يصطدم به و ينهي كل شيء بناه ..
الشاطر بيخطط صح !
الناس فاكرة التخطيط بيكون دايما بنية الشر و الهدم و اللف و الدوران ،،
مع إن التخطيط هو تنظيم و ترتيب و تحليل كل شيء قبل إتخاذ أي قرارات مصيرية ،،،
يعني قبل ما تشتغل مثلا أو تتجوز هل ينفع تاخد قرار في يوم و تاني يوم تنفذه؟
بدون معرفة كل مميزات و عيوب الشيء اللي انت داخل عليه و حيغير حياتك و مستقبلك ١٨٠ درجة !
هل ينفع إنك تصم اذنك عن سماع معلومات حتفيدك في التفكير قبل ما تنفذ ده بتهور ؟
أو موقف آخر حتنفصل فيه عن حياة إنت عايشها أو أشخاص إنت معاشرهم… هل حتصحي تمشي و خلاص فجأة !!
ده لو حصل يبقي معناه إنك بتاخد قرارات وليدة اللحظة و ده في حد ذاته غلط كبير ،،،
لازم بعد ما تفكر كويس أوي تبدأ تستعد للقرار اللي خدته و تنفذه بهدوء مش بهجوم! و لا بغضب ! و لا بإنهيار ،،
علي فكرة .. الناس بتاخد أي حد بجدية أكثر و بتحترم قراراته لما بتحس إنه عاقل و دارس الموقف صح ..
لما بتشوفك بتتصرف بنضج و هدوء و بترتب حياتك فعلا بمنطق مش بإنتقام من حد او شيء …
كمل أو إرحل ،، ده شيء يخصك تماما و مش من حق حد يجبرك علي أي وضع إنت مش عايزه،
لكن طريقتك في التنفيذ هي أهم بكتير ما في الموضوع كله.
