#المياه: نظرة سريعة على خريطة مصر هنعرف إن مصر بالأساس دولة صحراوية وده سببه قلة موارد المياه …..
مصر لا هي دولة منابع ولا عندها مواسم أمطار والمطر بيزورنا مرتين تلاتة في السنة بالعافية..
مصر بتعانى من شح مائي في الوقت الحالي وده كمان قبل ما نتعرض لكارثة لو تم ملئ خزان سد النهضة كما ترى إثيوبيا، وعلشان كده احتمال نصحى فى يوم نلاقى نفسنا بنحارب علشان الميه!
#الموارد_البترولية: احنا مش دولة نفطية زي السعودية اللى على يميننا ولا زي ليبيا اللي على شمالنا ولا حتى بنكفي احتياجتنا بنستورد زيت وغاز، ويادوب لسه محققين اكتفاء ذاتي من الغاز بعد ترسيم الحدود و اسكتشافات البحر المتوسط.
#الموارد_البشرية: بالرغم من إن التركيبة السكانية معظمها شباب ودى نقطة إيجابية، إلا إن الزيادة السكانية المرعبة حولت النقطة الإيجابية دي لنقطة سلبية بامتياز.
تحولت الموارد البشرية كعامل من عوامل القوة إلى عامل من عوامل الضغط في الاتجاه العكسى وبقوة.
إيه ده!! يعنى مطلعناش دولة غنية زي عمو صلاح جودة ما قالنا!
#متي_ستصبح_مصر_دولة_غنية ..؟
👈هنبقى دولة غنية لما أفرادها يبقوا منتجين وبيقدسوا العمل زي اليابان اللي ناسها بتوع شغل ومش مقضينها كلام والشعب يريد إسقاط البتنجان .
#الحكومة_مهمتها_تحول_الموارد_اللي_فوق_دي_إلى_قدرات.
يعني المفروض تحول الموارد البشرية إلى قدرة إنتاجية، ويبقى الفرد عنصر منتج وفعال، وده علشان يحصل لازم تهتم بالتعليم والصحة وجودة الخدمات وتأسس شخصية مؤهلة ومدربة على الإنتاج، مش على النوم في الشغل وفوت علينا بكره والقعدة على القهوة في انتظار الوظيفة الميري .
#السؤال_بقى هنعمل الكلام ده ازاى ومصر زادت من 2011 حتى الآن 18 مليون!!!! يعنى زادت في 8 سنين قد سنغافورة وفنلندا والدنمارك مجتمعين!!
عمالين بنزيد وبس ، بنزيد في الكم مش الكيف! بنزيد عدد مش إنتاجية!
#لوحة_الجهاز_المركزي_للتعبئة_والاحصاء اللي في صلاح سالم مش مبطلة زيادة لا ليل ولا نهار!
#فيه_ناس_مريضه بتحب ترمي فكرة تخوين مؤسسات الدولة في عقول الناس.
#الشعب بيعشق قصص الحاكم الظالم ورجل الأعمال الحرامي وفضايح الوسط الفني حتى لو بالباطل وبيصدقها من غير لا دليل ولا برهان، لأن عنده استعداد يسمع ويصدق النوع ده من الحكاوي اللي بتصل أحياناً لحد الخرافات.
#الشعب بيعشق البكائيات والقصص الدرامية وسرقونى وخدوا فلوسى ووراء كل رجل جائع شخص آخر سرق ماله.
#إحساس_المظلومية ده اللي بيخلي اللي مش عاوز يشتغل ويطور نفسه مش حاسس لا بتأنيب الضمير ولا تقصير لأنه عايش طول عمره في دور المسكين اللي خدوا حقه وسرقوا كنوز على بابا بتاعته ، تلاقي الموظف مبيشتغلش بذمة وبيبجح ويقول على قد فلوسهم.
#الدول_المتقدمة اللي بيميزها هو ضخامة الإنتاج والاستهلاك معا..
#عاوز_تبقى_دولة_متقدمة: اشتغل….إنتج ..إتعلم حرفة يدوية … طور نفسك بعد ما تتخرج…اتعلم لغة تانية… غير مجالك لو اضطريت ، انسى كلام صلاح جودة.. انسى البكائيات وإحساس المظلومية.. قلل استهلاكك..زود إنتاجك وساعات شغلك…….مش كدا ولا ايه
