طاقة نور

بقلم / مي أنور

خليك عارف إن زي ما كلمة من غيرك ممكن تخلي قلبك يرفرف من الفرحة. كلمتك الحلوة لغيرك يمكن تكون طاقة نور جوا قلب غيرك.
خليك عارف إنك أجمل خلق الله لما قلت كلمة حلوة لشخص وهونت الدنيا في عينيه لما مدحت في لبسه وكلامه وشكله وطريقة تفكيره واعطيت له شوية ثقة في نفسه ، لما شكرته على موقف جدعنة معاك وحسسته قد إيه كان سبب كبير في إنك تكون أفضل ، لما حسست غيرك بالقبول وإنه شخص فريد من نوعه في نقطه هو بيتميز فيها وإدتله دفعة قوية إنه يستمر في تحقيق حلمه ويحقق شغفه.
إنت أجمل خلق الله لما نورتله حته في روحه وقلبه ، لما كنت سنده وقت الضعف ، لما رجعتله توازنة ومشاعرة بعد كلمه صعبة اتقالتله.
خليك عارف إن كلمتك الحلوة وحنيتك سابت آثر جميل في قلبه مايتنسيش وهايفتكرك بيه طول العمر وحطك في مكانه كبيرة جوا قلبه،
الكلمة الجارحة القاسية ساعات كتير بتكسر قلب وتموت.
خلينا نختار كلامنا اللين الهين.
وماننساش قول الله تعالى(فَتَبَسّمَ ضَاحِكًا من قَولِهَا)
بلاش نبخل بالضحكة ولا نكتمها ، بلاش نبخل بالكلمة الحلوة.
فرحوا بعض وخلينا نكون طاقة نور لبعض