( يا تاجر الصبر )

ع الصبر غنوا كتير
في السيرة والموال
قالوا ده سره خطير
وكلام كتير انقال
والناس اهي صابرة
بتمد في حبالها
متعشمة يمكن
تتعدل الأحوال

ع الصبر ياما صبرت
والصبر ما صبرشي
والمر انا اتحملت
عن حالي ما بقولشي
قاسيت كتير م الليالي
والصحبة والاحباب
حتى حبيبي الغالي
غاب عني ما سالشي

ع الصبر انا صابر
وانا صبري على قدي
والصبر مش قادر
ياخد ولا يدي
طب اعمل ايه وياه
قولولي يا صابرين
انا صبري مني نفد
والعمر بيعدي

يا صبر صبرك عليا
اصبر على صبري
جفت دموعي ف عينيه
ما عاد دموع تجري
مهلك عليا يا صبر
ده انا ليا رب كريم
الليل مسيره يروح
واصحى على فجري