أدب
نفسي اشكيلك واقولك
بقلم مصطفى سبتة
انا نفسي اشكيلك واقولك
انا ليه متربي على ذلك
وليه القسوة من طبعك
مع اني جزء من كلك
انا كل عبارة نطقتيها
انا اجمل وردة زرعتيها
انا نبض الحارة والشارع
انا اعظم لوحة رسمتيها
انا اول واحد من صفك
انا صورة جميلة على رفك
انا كل دروبك ومداينك
انا كل حالاتك ومواقفك
انا فاطم قلبي من نيلك
انا وقت ادانك بدعيلك
انا كل مافيكي بيوحشني
وان كان على عمري اهديلك
طافيالي دايما ف شموعك
مع اني الرافض لخضوعك
ولا عمري رضيت اني افارقك
او اخرج مرة عن طوعك
على غيري تخافي وتحني
وعليا حالفة ماتمني
وكل ماالومك واشكيلك
الاقيكي ف حبي بتظني
من حضنك دايما حارماني
مع انك دمي وشرياني
لكني وقت مابحتاجلك
الاقيكي ياعمري ناسياني
انا نفسي ف حبة حنية
عامليني حمامة ف بنية
انا نفسي اشوفك انسانة
او حتى اشوفك جِنّية
صالحيني قبل ماتنامي
وياريت تزوريني ف احلامي
وخديني ف حضنك واتوصي
وريني الراحة ف أيامي
