صالح نفسك للشاعر بكري جابر
للشاعر بكري جابر
تسابيح
والقلب براح
الذِكر جناح
بيسافر بيك و لأبعد حد
رعشة قلب تعيد تكوينك
بس الحب في شرعك إيه ؟!
شِيل الزحمة و طمع النفس
بُص عليك
فكّر إنك بكرة مفارق
إوعى تعارك ع الاوهام
خلي السما دايما قدامك
سَلسِلْ كل جنونك فيك
خليك طيب
حَكِّمْ عقلك
نًوّرْ قلبك بالإحسان
إحسان إيه ؟
احسان إنك معبد حب
ساقية بتملا الخير و تصب
إوعى تكّسر قلب الناس
خلِّى الناس أصحاب و قرايب
قَرّبْ أكتر م السموات
صالح نفسك
دا انت ما ليك غير عمر معدي
إوعى تبيعه ياصاحبي بلاش
خليك نور
إوعاك تمشي بدون ما تخضّر شبرين بور
إوعاك تنسى النار و الجنة
الجنة يا صاحبي مهش أشعار
الجنة الحب
حب حقيقي مفهش مصالح
اااه يا مصالح
سرقت قلب الناس من بعض
دُقْ الباب
سَبّحْ بيك
إرمي حمولك ع الأعتاب
عيش الحَضرة
عدي و طوف
هِدّ الخوف من بكرة و بعده
افرش دمعك ع الغيطان
ابني مقام الحب في ذاتك
انده ع الموصوف للخلق
رحمة و حب
عمره ما رد
دمعة مشتاق
الشوق سَوّاق …
و السكة طويلة
إوعى تتوه منك في السكة
الفرح حقيقي ان انت تروح ….
و تشوف الروح ويا الاحباب
إن انت تكون سطرين في كتاب
بعد ما تمشي .
قبل ما تمشي …
خليك طيب زي البحر
صافي و دافي
لكل الخلق
نهر الحب ينادي عليك
تفرح بيك
تتهنى بجد
