أدب
وبقيت أخاف للشاعر بكري جابر
وبقيت أخاف
الشاعر بكري جابر
وبقيت اخاف
لحظة لقاك
لمّا الحنين
يرسم حروف الأمنية فوق الطريق
شجرة عطش
مع إن حلمي ف اللقا شئ مستحيل
لسه الجروح المؤلمه فوق الضلوع
تنزف وجع
شوق مستكين
خايف وعيني ع الطريق
نفس الطريق
نفس الوجع
نفس الزهور العطشانين ساعة لقاك
بس الدموع حبات ندى
ع الخد بعترها الخريف
نبض الخطاوي ع الطريق
بيحل حبل الذكريات
بيصحي فيّا حب مات
ويشد قلبي من غابات الهاربنين بره الوجود
يااااه ع الحياه
و الفرح ف جبين الأمل
متزوقة نفس الأماني بالربيع
خايف تضيع ( ….. )
نفس الأماني
والغناوي
والجرح ف عيون الولد
طعم الألم …..
لساه بيعزف ف الضلوع غدر السنين
ملنش نصيب نفرح يا قلبي بالغرام
شِدْ اللجام علي خطوتك
وانسى الحنين
إلبس لباس الصبر و اهرب م الطريق
خليك حكيم
وكفايه تشرب دمعتك
كاس الجراح
ذكرى بتهرب م النغم
وبقيت اخاف