أدب
( مسلم مسيحى رافع الصليب )
( مسلم مسيحى رافع الصليب )
مسلم مسيحى رافع صليب
بقلب أبيض صافى حليب
الفرحة على كل الوشوش
مفهاش أى شيطان غريب
صلبان مرفوعة بكل محبة
فرحة و لمت كل الأحبة
ديم يارب محبتنا
متخليهاش تنقص حبة
الكل فرحان بعيد الغطاس
محبة و فرح بكل أخلاص
الصورة دى تلاقيها عندنا
مش فى أى بلد و خلاص
دى صورة ب 1000 معنى
صورة مصر اللى بتجمعنا
ملمومين الكل فى صورة
منظرها بيغير طعم وجعنا
صليب و جلبية و بلابيصة
ده عيد على الكل و هيصة
الكل عايش فى الفرحة
متعرفش أحمد من ويصا
دى مصر اللى عارفينها
هتفضل زى ما شايفينها
مش هنسيبها أبدا تتوه
ولا هندور و نقول فينها
هتفضل كده على طول
مهما يجرى العمر و يطول
دى مستحيل أبدا تتغير
ولا حدش منها هينول
جمعنا يارب فى واحد
أبعد عننا أيها جاحد
على لمتنا و محبتنا
يارب أنت شاهد
كلمات : محمد فتحى