مسرحية فكاهية ………….. بعنوان(أبو بلطية بيه)……….
بقلم الكاتب/محسن رجب جودة
المذيعة:أعزائي المشاهدين أهلا ومرحبا
بكم في برنامجنا الأسبوعي(شخصيات مضيئة)وفي هذه الحلقة نستضيف
الشخصية الفريدة والنادرة …..أبو بلطية أحد المرشحين لمجلس الشعب
أبوبلطية:يقوم من على الكرسي ويرفع يديه فوف رأسه قائلا شكرا شكرا وكأنه
نجم سينمائي في حفل توزيع الأوسكار
المذيعة:ممكن نعرف اسمك بالكامل
أبوبلطية:وأنتوا عاوزين تعرفوا اسمي بالكامل ليه هو أنتوا هاتنسبوني
المذيعة:لازم الناس تتعرف عليك أمال هتنتخبك إزاي
أبوبلطية:خلاص ياست أنا اسمي بالكامل أبوبلطية قرموط أبو جعمص الزفر
المذيعة:تضحك وتقول هو حضرتك من عيلة الزفر
أبوبلطية:ومالها عيلة الزفر إحنا هانبتدي المياصة ولا أيه عيلة الزفر دي أشهر عيلة في حارة السمك
المذيعة:والحالة الاجتماعية
أبوبلطية:وأيه الحالة الاجتماعية دي حاجة بتتاكل
المذيعة:يعني متزوج ولا لأ عند أولاد والست مراتك ..والحاجات دي
أبوبلطية:أتحشمي ياحرمة متجبيش اسم الست حرمنا أمام الأغراب وعلى العموم أنا متجوز وعندي خمس أولاد …قرموط…جعمص…موسي…فحار….جمبري
المذيعة:تضحك قائلة أنعم وأكرم عيلة تشرف بصحيح
أبوبلطية:شكرا ياذوق
المذيعة :وأيه رمزك الانتخابي
أبوبلطية:الشبشب
المذيعة :مستغربة وأشمعنى الشبشب ما الرموز كتير
أبوبلطية:رمز البساطة وتاني أهل حتتي هما اللي أختاروه وألفوا عليه أغنية حلوة أوي
المذيعة:ممكن تقولنا عليها
أبوبلطية:أبوبلطية أبوبلطية رمز الشبشب يا أفنديا …..أبو بلطية يا ابن الناس ياترباس يا ابن الترباس
المذيعة :وما هو برنامجك الانتخابي
أبوبلطية :أنا نفسي أعمل حاجات كتير ولكن أول حاجة هي ……قررنا نحن أبو بلطية بيه بمنع المخللات نهائيا من الأسواق والبيوت
المذيعة:تستغرب قائلة وأشمعنا المخللات
أبوبلطية :ما أنتي لو ناصحة مكنتيش قولتي ليه وعلي العموم ها أقولك المخللات ليها أضرار وفي نفس الوقت بتفتح نفس الواحد على الأكل بدل ما الواحد بياكل رغيف ولا اتنين بتخلي الواحد يلهط خمسة ولا سته واحنا عايزين نوفر ونوصل الدعم بقى لمستحقية الناس تعبت خلاص
المذيعة:وأيه تاني
أبوبلطية:قررنا نحن أبو بلطية بيه بجعل الكشك وجبة اساسية لكل الناس
المذيعة:وأيه الكشك ده فيتامينات ولا أيه
أبوبلطية:أصل أنتي من بتوع بابي ومامي وبتوع العيش الفينو ما أنتي لو جربتي الكشك ده مكنتيش عملتي زي البوصة الناشفة اللي قلبها فاضي من جوه
المذيعة: والكشك ده بيتاخد حقن ولا برشام ولا حاجة بتتشرب
أبوبلطية:يضحك ها ها ها ….لا بيتاخد بالرضعة أنا بقول لنفسي من الصبح أنا قاعد مع واحدة عبيطة محدش مصدقني أصل أنتي متعرفيش غير الأحمر والأزرق والهباب اللي بتحطوه على وشكم حريم أخر زمن وعلى العموم الكشك بيتاكل ومصنوع من القمح واللبن
المذيعة :وعندك حاجة تاني عاوز تقولها
أبوبلطية:أهم شيىءبقى التعليم …بلا تعليم بلا وجع دماغ اللي يقدر على التعليم ومصاريفه يتعلم محدش هايحوشه واللي ميقدرش يروح يشوفله صنعة واللي مش لاقي ييجي عندي وانا أشغلة في مزارع السمك بتاعتي حتى نكسب فيه ثواب
المذيعة : أنابختلف معاك فى الرأي أهم حاجة لازم نهتم بيها التعليم ولازم يكون مجاني كمان ويتم تحسينه باستمرار………
أبوبلطية :وأنتي مين بقى عشان حد ياخد رأيك أنتي أخرك كيس بطاطس
وتقعدي أنتي والفرفور بتاعك تقرقشو فيه بقى أنتي بتقطعي كلامي طب
عليا الطلاق بالتلاتة ماأنا قاعد معاكي
