“مجتمعنا التقليدي”
كتب:-أحمد عطاالله
من وإحنا اطفال و المجتمع بيربي جوانا نقطة تبرير كل حاجة فينا … فانتا لازم تبرر ليه قلت الكلام الفلاني ؟! .. ليه عملت السلوك المعين ؟! .. ليه انتا كدة بالتحديد !؟؟! .. و السبب ببساطة إن المجتمع نفسه مش مستعد يتعايش مع شخصيات غريبة او غير مفهومة بالنسبة له ، فلازم باستمرار تثبت له انك عادي و مفهوم .. كل ده بيخليك موجود دايما في وضعية الدفاع او الاعتذار … و اللي مع الوقت بتلاقيك بتدافع عن حقوق طبيعة من حقوقك و اللي منها حق الاختيار الحر .. أو تتأسف عن كونك قررت تبقي نفسك مثلا !! ..
… بس الكارثة مش في عدم استيعابنا للجزئية دية ، إنما الكارثة الحقيقية ان بالرغم من يقيننا بكدة ،، فيه حالة عامة من الاستسلام و الرضوخ لميل المجتمع في تفتيت اي معالم تميز في الفرد …. فاحنا حاليا بنعيش ازهي عصور التفسخ الانساني بترحيب و استحسان منا !!! .. لدرجة اننا ادمنا حالة الخنوع دية و بقت هي الاساس ! .. بقينا مرضي هوس كشف اسرارنا و خبايانا .. ضحايا قهر الزامي نشرح مشاعرنا للناس و نثبت قناعتنا للعموم .. لدرجة اننا فقدنا اي ذرة ثقة في ذواتنا .. و ثقتنا الوحيدة بقت من تقبل الناس و موافقتهم علي اختيارتنا و ادراكتنا !!
و الحقيقة ، انك مش مضطر ابدا تبقي كدة .. مش مطالب انك تكون مادة حسم او حكم و لو حتي لاقرب الناس ليك !! .. مش من المنطقي اصلا انك تلتفت لاي صوت مزعج جواك يقلقك او يتعبك لو حسيت انك مش مفهوم او مختلف …
فاللحظة اللي بتبدأ فيها تعيش فعلا هي لحظة ما بتصدق انك مش مجبر ابدا تبرر اي حاجة لاي حد … او ملزم تفسر نفسك للي حواليك …
احمد عطاالله
مقال ادبي،اجتماعي ❤ :-
