تعلمي كيف تكونى أم
حتي لاتشتكي من
عناد،او صوت عالي أو عدم الطاعة أو……….
كيف؟
الأمومة هي أجمل إحساس في الدنيا ( اللهم اعطيها لمن يريدها) ولكن هناك أمهات مقتنعة أنها كأم فهى مجهدة وتعبانة وعصبية ومكتئبة وتقوم بأعمال فوق طاقتها.
أحب أقولك : طالما هذا الإعتقاد في بالك فلن تجني إلا مشاكل مع أولادك وعدم طاعتهم وكل أنواع الشكوى التي تشكو منها معظم الأمهات .
ولكن ماهي الامومة؟
لكي تكوني أم:
1- حاولي أن تخفضي صوتك مع أولادك حتى يتعلموا الصوت المنخفض في الحديث
يلعبوا ويتنطتوا سيبيهم
هما أطفال جواهم طاقة وماتصوتيش وتقولي ( كفاية بالصوت العالي)
2- عودي ولادك لما تنيميهم تحكي لهم حدوتة ،،عارفة الموضوع ده له فوائد وهى :-
– أولادك بيشعروا باطمئنان معاكي وراحة ورضا نفسي وسعادة داخلية (إشباع)
– هايطوعوكي لما تقولي ياللا ناموا لأنهم هايبقوا مستنيين الحدوتة
– بتزيد الصلة بينك وبينهم بالمحبة.والود والاحتضان والهزار أثناء الدخول في النوم .
3_ عودي نفسك أنك تقعدي مع ولادك واتكلمي في أي موضوع و تقربي منهم ويحبوا القاعدة معاكي ومن هنا يبدءوا يحكوا لكي كل شي وتبقي العلاقة بينكم فيها تفاهم وقرب
لأنك بتسمعي لهم ودي أهم نقطة
اسمعي لولادك شوفي إيه اللي جواهم ،
إيه اللي مضايقهم
هاتعرفي تعالجي مشاكلهم وتقومي تصرفاتهم لأنك بتسمعي لهم وهما أيضا هايسمعوكي
4- جربتي لما ييجي ولادك من المدرسة تحضنيهم أو لو حسيتي أنهم زعلانين من أي حاجة أنك تحضنيهم
حضنك ده بالنسبة لولادك بيشعروا فيه أنهم يملكون الدنيا وأنهم في منتهي الأمان والاطمئنان.
6- عودي نفسك أن الأكلة اللي بيحبوها وتعمليها تقولي لهم :
أنا عاملة الأكلة دي علشان أنت بتحبها
الجملة دي ليها أثر إيجابي وبيقربك من إبنك
7- لو عايزة بنتك تساعدك اتعودي :
تطلبي منها وتشكري ف اللي عملته وتقولي لها
الله أنتي. وضبتي الكنبة( مثلا) أحسن مني أو انتي بتروقي بطريق جميلة
هنا هي اللي هاتطلب تساعدك
أو قولي أنا وانتي هاندخل مسابقة نشوف مين هايخلص الأول وسيبيها هي تكسب هاتشجعيها . إنها تساعدك.
8- عودي نفسك أنك ما تنتقديش إبنك أمام أي إنسان غريب .لأنك لو بتعملي كدة
أنتي كدة بتزودي عناده لأنك شوهتي صورته
بالعكس دائما اشكري في ولادك أمام الغريب
ودارى علي عيوبهم .
9- أوعي تقارني ولادك بأي انسان في مثل عمره أو أخوه لأنك بتكرهيه في الاتنين وبيزيد في تصرفاته السلبية
10- إياكي ثم اياكي وضرب أولادك
الضرب بيسبب لهم عقدة وكره بيعبروا عنه بالعناد وعمل أي شي يضايقك وعدم سماع الكلام
لأنك اذتيه نفسيا وجسمانيا وهو طبعا مش هايرد الضرب ليكى بالضرب فبيرده بالعناد وكل شئ يستفزك ..و بتشتكي منه
11- جربتي تنادي علي إبنك أو بنتك بكلمة
ياعمري أو ياحببتي أو ياقلبي
أنتي بتقربيهم ليكي بطريق غير مباشر .
12- جربتي بدل ماتنتقدي تصرف خاطيء لهم بأسلوب فيه تعنيف أن تصححي غلطهم بطريقة: تقولي
أنت لو كنت اتصرفت تصرف تاني غير هذا التصرف كان هايبقي افضل
هنا بيتقبل نقدك دون رفض أو معاندة لانك اتكلمتي معاه علي أنه مش كل تصرفاته غلط
13- ياريت بلاش كلام سلبي مثل
يافاشل يا مستهتر أو أي الفاظ سلبية
بدليها ب:
علي فكرة انت مخك حلو وخسارة تضيع الميزة دي باللا مبالاة
هو هايسمع لك لانك مااستفزتيهوش بكلام سلبي
اخيرا:
*الإهتمام بالاولاد واحتضانهم والهدوء والتعقل في التعامل معهم هي دي الأمومة
– كتري من القعدة مع ولادك.وا سمعي ليهم جيدا
صدقيني هايقربوا منك ويسمعوا كلامك
وهنا تقدري تحتويهم في أحرج فترة من عمرهم وهي المراهقة
