كتبت /
د/ ايمان السرياقوسى
متى يكون التدخل المبكر.
هو ممكن أقدر أعرف بدري إن كان طفلى يعاني من تأخر معين في تطوره العصبي و الذهني .
ومتى تكون استشارة الطبيب والبدء فى العلاج
عاوزه أقولك أن من الصعب على كتير من الآباء و الأمهات أن يلاحظو التأخر في التطور الذهني وده على عكس القدرات الحركية اللي سهل متابعتها خصوصا لو فى خبره فى تربية أطفال قبل كده .. أو من خلال الملاحظه العادية..
لازم يكون التدخل بدرى لأن كل ما كان بدري .. وأقصد بدرى (قبل سن ال3 سنوات) ..كل ما كانت النتايج أفضل كتير بمشيئة الله تعالى..
عشان كده لازم نأخذ بالنا كويس أوى ولو شوفنا الأعراض اللي حتكلم عليها ديه عند الطفل ،، لازم نستشير الطبيب فورا ..
ركزوا معايا من فضلكم
عند سن 4 شهور
الطفل لم يبدأ يخرج أصوات أحادية المقطع زي با .ما .. دا كده فى حاجه غلط.
عند سن 5 شهور
لو لم يبدأ يمسك الحاجات التى تعطيها له بأيده فى حاجه غلط .. و لو مسكها ميحطهاش في بقه
لو عند سن 5 شهور و مش بيبتسم للوجوه المألوفة بالنسبة له..ولو عند سن 6 شهور مش بيتابع الاشياء المتحركة بعينيه.
ولوعند 9 شهور و لسه مش بيلتفت لمصدر الصوت و مش قادر يحدده .. فورا الإتجاه للطبيب
عند سن سنة و لسه الطفل منطقش كلمته الأولى اللي غالبا بتكون ماما أو بابا .. عند سن سنة و مش بيعرف يعمل باي باي لما حد يعملهاله .. يبقى فى حاجه مش طبيعية
عند سن سنة و مش بيعرف يشاور على الحاجة اللي هو عايزها.. و عند سن سنة و نص لسه بيحب يرمي الحاجة من أيده و يبص عليها و هي بتقع و لسه مش بيمشي .. أو بيمشي على أطراف صوابعه .. كده حاجه تقلق
عند سن سنتين و مش بيقلد الكبار . و مش عارف إستعمالات الأشياء اللي حواليه في البيئة اللي هو عايش فيها زي الفرشة . التليفون . المكنسة ..المكواه.. وكمان لاتوجد عنده القدرة على فهم و أتباع الأوامر البسيطة زي هات . خد . البس . أجري .. أقف .. أقعد.
أوعى تسكتي
عند سن سنتين و نص و مش بيكون جملة من كلمتين على الأقل . زي . عاوز أشرب . هات كورة . عاوز أكل وعلى فكره مش شرط النطق يبقى واضح مية في المية .وخلى بالك لو مش قادر يفهم او يتبع الأوامر المركبة من جزءين . زي مثلا خد الكوباية من على الطربيزة و اديها لماما .. أو أفتح الدرج هات اللعبة واديها لبابا.
ديه كده أعراض مقلقة لازم نأخد بالنا منها
لازم نستشير الطبيب فورا.
عشان لا قدر الله لو في مشكلة نبقى قادرين على التدخل المبكر للحصول على أفضل النتائج الممكنة .
أطفالكم أمانة بين أيديكم ..ربنا يحفظهم ويبارك فيهم.
