الشاعر_جوده_فتحي
وليه الدنيا واخدانا
ف سكة ليل
وليه ننسي وليه نرضي
بألف دليل
وليه الشمس مش طالعة
وحظ يميل
وليه العدل مش مولود
ف حضن السيل
وليه ننسي ليالي زمان
وأنا وإنتا نعيش ف الويل
وليه الذل متفصل
لناس تايهه مع الملكوت
ولا تفكر تعيش أكتر
ما بتفكرش غير ف الموت
وليه الحزن بيعشش
ما بين القلب لو عاشق
وما بين الضلوع مسجون
أنا شاعر ومش مجنون
وليه قطر الديابة يمر
وليه فيه ناس تموت تحتيه
وليه يعني اللسان مش حر
أنا بأسأل سؤال عابر
طب ليه الدنيا واخدانا
وليه أيامنا سرقانا
ومين ديما معاه الحق
ومين يقدر يقول للغول
عنيك حمرا وألفين لأ
مؤشر بصلتي مجنون
وليه نعيش الحياة استسلام
وأمته ألاقي بس سكون
ومين فينا اللي جه غلطة
ومين فينا أصل الكون
وليه يا حزن بتجمع ف خطاوينا
وكاس المر ف الغربة
دموع بتسيل
وليه الدمعة أحيانا
بتستعصي علي عنينا
وليه أصل القلوب ماتت
ولا عادت كما البساتين
قلوب الخلق مليانة
جراح وأنين
حتي الصرخة جوانا
مكتوبة بحبر حزين
سنين العمر بتعدي وراها سنين
بتسرق حلمنا الوردي
ومش حاسين
ومش عارفين فين إحنا
وفين رايحين
أنا بأحلم
وأحلامي مهيش ف الطوع
وحلمي كبير
لكن لابس لتوب مقطوع
ونسمة فجر بتعدي
ومش عارف أنا ماشي
ولا يمكن أكون واقف
وف الممنوع…
