يارفيق عمرى السنه دي
عيد ميلاك مختلف
إنت فعلا مش معانا
بس انا ليك باعترف
انت فينا لسه عايش
لسه فارش فينا روحك
لسه بتطل بملامحك فى الولاد
لسه سامعين صوت دخولك
وانت راجع كل يوم نفس الميعاد
وانت شايل كل حلو
قبل حتى مانطلبه
وانت داخل بابتسامه وحضن يجمع والادين بيطبطبوا
إنت فعلا مش معانا
بس سايب لينا صورك
وشهداتك تسجيلات الصوت وقلمك وكتباتك وحكاياتك والصحاب والجيران
والقرايب والمكان
عطرك الفواح بينطق فى الدولاب
والكتاب اللى انت سايبه ع المخده
ذى ماهو بملحوظاتك
اعدتك وقت العصارى فى الفارنده
وردة الصبار وعصفور الكاناريه
ذى ماهم بس كبروا يوم مماتك
ملحوظاتك للولاد فى كل حاجه نفذوها
وكل يوم بيشوفوا صورتك ويبوسوها
وكل مره بتيجى سيرتك يعلنوها
بالمشاعر والدعاء
والتمنى والرجاء لربنا يجمعنا عنده فى السماء
وف مساء كل ليله يودعواصورتك
في انتظارهم للقاء
يابقاء الحب فى عيون كل ناسك
كلهم حابين ولادك زرع فاسك
اصل طيبتك واحتوائك للقرايب
والعطاء من ايديك كان سهم صايب
كل من مديتله ايدك
و لما يجى وقت عيدك
مش حزانا فرحانين كمايوم وجودك
والسنه دى فى عيد ميلاك
فرحانين رغم البعاد
فرحانين بنجاح ولادك
بس فرحه بدون حداد
اما انا رغم الحشود لمة الاهل الجميله والشموع ويا الورود
والاغانى بصوت عيالك
مشتقالك
ضمتك حضنك وايدك
نظرتك وجمال حنانك
مشتقالك
نفسك الدافى فى ليل الشتا البردان دفا
مايعوضوش انفاس عيالك
العيال عايشين بسيرتك اماانا لسانى دواره فى مجالك محتاجالك
