عاوزة ورد يا ابراهيم محاكاه يومية للحياة الزوجية

بقلم : اماني درويش

عاوزة ورد يا ابراهيم
كل عيد للحب يخلص
وانت ودنك من عجين
كل يوم اطلبها منك
وانت لسه مجبتليش
كل يوم العمر ينقص
لحظة حلوة تروح متجيش

رمضان اهو داخل
هاتلي فانوس
طب سيب فلوس
هو يعني يا راجل انت
كل مرة تقول مفيش !!
هنصيف فين ؟
– قولِي منين !!
اشمعنا يعني جارتنا سامية
جوزها ودّاها العلمين
هاسكت يختي
منا عارفة بختي
‏كل مرة يقول بعدين
‏كنت اتمنى ع البحر اتهنا
‏واتعشم حنّا يخش الجنة !
واهو ‏فات شهرين
‏ جانا العيد
كل عيل م العيال
عايزله بنطلون جديد
‏طب هاتلي بلوزة
‏يا صغيرة ع الهم يا لوزة
‏ولا مصيف ولا حتى عيدية
‏انا كان مالي ومال دي جوازة 👰
‏
والمدارس جاية تجري
والفطار الصبح بدري
قسط اول ، قسط تاني
اخويا خد قلمي
سيبي انتي كتابي
ااااه يا دماغي
رايح فين وسايبني ف همي
ولا على بالك !!
– نازل القهوة
– حليها انتي وظبطيها ،
– مشي حالك !
طب قولّي ازاااي ؟!
والمستر عاوز شهر فات
قبل ما يهل ال جاي
آآآدي إيجار
و آآدي فواتير
دا مرتب ولا جوزين عصافير 
– مليش فيه
‏اهو مصروف البيت ف اديكي
اتشقلبي فيه

طب خد انت الواد وذاكرله
بدل القهوة ولعب الطاولة
– لا مش فاضي ، عندي صحابي
– ونامي انتي عشان هتأخر
حتى فـ يوم الجمعة هتسهر !
‏خد راحتك يا مقلل راحتي
‏على كيفك يا تاعب اعصابي
‏يوم عن يوم الحِمل يشد
غسيل طبيخ
عيال صريخ
حيلي اتهد
يا ابراهيم ما تجبلي ورد
انشاله حتى وردتين
قبل ما الحلو اللي بينا
يمرره تعب السنين
قبل مالعيال تكبر
والكل يتوه فدنياه
قبل ما العيون تضعف
والشعر شيبه يملاه
هاتلي ورد 🌹