المستشار القانوني سيد يونس
هتعملي ايه لما جوزك يطردك من البيت؟
ويقولك مش عاوز اشوفك تاني وملكيش حاجة عندي؟
ايه هو التصرف القانوني الصح الي المفروض تعمليه؟
وايه هيا اجراءات التمكين من مسكن الزوجيه؟
وبتاخد وقت اد ايه ؟ ولو الشقه مش باسم الزوج هل هتاخديها ولا كدا خلاص هتترمي في الشارع؟ ويعني ايه اجر مسكن؟
ولو الزوج باع الشقه هتتصرفي ازاي وهل ينفع فعلا الزوج يبع الشقه بعد التمكين طب هوا يفرق في القانون بيع الزوج للشقه قبل التميكن ولا بعده ؟ طب ايه هيا الحالات الي من حقي اجر مسكن بس ومليش تمكين من مسكن زوجيه ؟
متقلقيش حضرتك علي كل الاسئله دي واسئله اكتر من كدا بتيجي علي بال حضرتك بس في الاول احب اطمنك ان الشقه من حق الزوجه الحاضنه وركزي معايا حضرتك واكيد لو بتمري بمشاكل لازم تفهمي عشان تتصرفي صح
بالنسبه للتمكين من مسكن الزوجيه دا بيكون في حاله الزوجه الحاضنه والزوج طردها من الشقه وهيا محتاجه ترجع الشقه تاني بس السؤال هنفرض ان الزوج رافض يديها الشقه ومش راضي يرجعها ولو رجعت هيضربها او هيتعدي عليها؟
التمكين دا مش لازم الزوج يوافق علي الرجوع لانه بالفعل القانون بيعتبره رافض وبيتنفذ غصب عنه عن طريق القوه الجبريه ومش محتاجه حضرتك يكون معاكي عقد الشقه وعشان محدش يضحك عليكي هقول لحضرتك بيخلص ازاي الموضوع
حضرتك بتروحي علي طول علي القسم تحرري محضر طرد من مسكن زوجيه
و محضر بطلب التمكين من الشقة.
ثانيا: أن تقدمي ضمن المحضر قسيمة الزواج، أو شهادة الطلاق.
ثالثا: تقديم شهادات ميلاد الأولاد الصغار.
رابعا: المعتاد أن تحفظ النيابة المحضر إداريا.
خامسا: ردا على حفظ النيابة تقدم المتضررة تظلما على قرار حفظ المحضر.
سادسا: النيابة تأمر بعمل التحريات من قبل المباحث.
سابعا: إذا أثبتت التحريات أن الشاكية كانت تقيم في الشقة موضوع الشكوى هي وصغارها يصدر قرار بتمكينها من مسكن الزوجية، بالمشاركة مع الزوج، وإذا كانت مطلقة يصدر قرار التمكين لها فقط.
وبعدين بيتم سماع الشهود الي هما الجيران والتحريات وبعدين بيصدر لحضرتك القرار وبيتنفذ بالقوه الجبريه
بس هل التمكين دا ليكي لوحدك ؟ ولا الزوج كمان هيتمكن معاكي في الشقه ؟
بصي حضرتك لو لسه متطلقتيش يعني العلاقه لسه قائمه هيصدر قرار اسمه تمكين مشاركه يعني انتي والزوج هتتمكنوا من الشقه سوا وهيتعمل محضر عدم تعرض بس لو حضرتك اتطلقتي او كنتي مطلقه هيصدر قرار بتمكينك لوحدك
يعني المعيار هنا هل الزواج قائم ولا اتطلقتي حضرتك
طيب السؤال لو حضرتك مش محتاجه الشقه دي لانها مثلا في بيت عيله او بعيده عن اهلك او انتي اصلا مش بتحبيها لاي سبب كان خلاص كدا ملكيش شقق ؟
لا طبعا القانون اعطي لحضرتك الاختيار بين التمكين دا وبين حاجه اسمها اجر مسكن هشرحها لحضرتك في السريع كدا
اجر المسكن
لو الزوجه مش عاوزه نفس مسكن الزوجيه او الشقه كانت قانون جديد وخايفه ميدفعش ايجار او ايا كان السبب
فمن حق حضرتك ترفعي حاجه اسمها اجر مسكن والقاضي هيحدد ليكي مبلغ نقدي هتاخديه وتاجري حضرتك شقه في اي مكان براحتك
طيب ايه الافضل اجر المسكن ولا التمكين؟؟
اقول لحضرتك الاتنين صح بس حسب رغبه حضرتك وظروف كل زوجه الاختيار معاكي اختاري دا او دا كله صح
طيب سؤال هوا كدا انتي بتتملكي الشقه دي
طبعا لا انتي بتاخدي الشقه عشان حاضنه وبعد مالاطفال يعدو سن الحضانه الشقه هترجع للزوج
طيب مالزوج ممكن يبيع الشقه؟
فعلا لو حضرتك اتاخرتي في اجراءاتك الزوج ممكن يبع الشقه وعشان كدا بننصح ان دي اول حاجه تعمليها لو فيه خلاف قبل مالزوج يتصرف في الشقه لانه لو باع بعد التمكين فهيكون البيع دا صوري وغير حقيقي وهيكون هناك سوء نيه من الزوج ومش هيسري معاكي وهتاخدي الشقه عادي
طيب هيا الاجراءات دي بتاخد وقت اد ايه
طبعا الوقت دا بيختلف من مكان لمكان ومن نيابه لنيابه وملهاش وقت محدد بس في العموم هيا مش بتطول
…نصيحة …
محدش منكن تفكر تعمل كل ده الا لو كانت الحياة شبه مستحيلة بينها وبين زوجها .يعني مش مجرد زعلتي شوية تجري تعملي فيه كده وتخربي علي نفسك وبيتك
….وأدعو الله لكم جميعا بالهداية والستر .
