دوشة عيال وجدو تعبان
للشاعر عبد المنعم حمدي
جدو ياولاد تعبان ومصدع
جدا وده بينط وده بيفط
وده بيقلد كلب وبيهوهو
وده بينونو نونوة القط
وكله بيزعق فى نفس واحد
هرج ومرج وغاغة ورط
اسكت ياواد وانت يا بت
بطلوا دوشه ورقع وخبط
صدعتوا دماغى بشقاوتكم
وده يتشال ودى تتحط
دايما تعملوا على طول
هيصة وهليلة وشقاوه ونط
ذاكر يالا واكتبي واجبك بدل
العفرته والشيل والحط
أاكتبى واجبك حسن خطك
خطك ولا نعكشة البط
وأرسم دايرة ومربع ومثلث
بالمسطرة ووصل الخط
أرسم مركب وله مجداف
وشراع ونخلة على الشط
وكمان كتاكيت جنب مامتهم
ووياهم ديك ووز وبط
الشاعر / عبد المنعم حمدى رضوان
