في كل بيت لازم يكون فيه فردين من الأبناء ليل نهار يناقروا في بعض مش مستحملين بعض ..يعاكسوا بعض .من الآخر ( فوق رؤوس بعض ) وبيتي ماكنش شاذ عن هذه القاعدة ..فعندي بنت وولد من هذه النوعية .. ليل نهار.. ضربني بيبصلي ..مسكت قلمي حرك شنطتي وهكذا ..
كنت كتير عشان أريح نفسي أبعدهم عن بعض أفصلهم كل واحد في غرفة وأقلهم إياك حد فيكم يكلم التاني أو يقرب منه ولكن للأسف بدون فائدة لأني حسيتهم بيبعدوا عن بعض أكتر وبيتربصوا ببعض أكتر ساعتها قلت الفصل مش هاينفع ولكن الإلتصاق أكتر هو إللي ممكن يجيب نتيجة ..وفعلا مع أول مشاكسة ليهم لبعض كان القرار الحازم أنتوا الإتنين طول النهار هاتفضلوا مع بعض ..
وممنوع نهائي واحد فيكم يبعد عن التاني أكتر من خطوة واحدة أنتوا أخوه ولازم تتعلموا تتقبلوا بعض بإختلافتكم وتتحملوا بعض وتحاولوا توصلوا لنقطة تلاقي بينكم بحيث إنت ترتاح وهي ترتاح وحذرت وبشدة من مخالفة الأمر …طبعا الدنيا اتقلبت وكلام من نوعية..مستحيل ..ولا.. ومش هاينفع ..ومش هاستحمل ..بس أنا صممت ..حاولوا يطلعوا أي ثغرات في الخطة لدرجة إن البنت قالت طيب لو أنا عايزه أدخل التواليت هانعمل إيه
قلتلها ماتقلقيش أدخلي واخوك هايستناك على الباب في النهاية وبعد ما شافوا تصميمي رضخوا للأمر ..وبدأت التجربة
في البداية بدأوا يستفزوا بعض ويغلسوا على بعض يعني هو يقولها عايز أقعد في الغرفة دي وهي تقوله مش عايزه دي وتمشي للغرفة الثانية وهو طبعا يجري وراها عشان ماينفعش ينفصلو عن بعض …تكون مثلا هي قاعدة بتعمل حاجه مهمة هو يقولها هاروح أشرب فهي تضطر تسيب إللي في أيدها وتجري معاه كل ده أمام عيني وأعين اخ7وتهم ..وكلنا بنضحك ومستمتعين جدا بالأمر..وفضلوا كده لحد ما حسوا هما الإتنين إن الوضع كده مش هاينفع وهما الإتنين خسرانين وابتدوا يتفقوا مع بعض وكل واحد فيهم يتنازل شويه عشان خاطر التاني ..وفعلا بدأوا يتفقوا ..الغريب إن على نهاية اليوم لقيتهم بيضحكوا مع بعض وبيتكلموا ودي كانت أول مرة اشوفها لقيتهم جايين في الآخر وبيعتذروا وبيقولوا خلاص يا أمي إحنا اتفقنا مع بعض وعرفنا ازاي نتحمل بعض ومش هانعمل كده تاني : )
إللي اتعلمته أنا من التجربة دي إن الإنفصال عمره ما كان حل بالعكس بيبعد الأولاد عن بعض أكتر ويخليهم متحفزين أكتر لبعض وبيكونوا سلبيين بيعلمهم الهروب من المشاكل
وإن أي حد يزعلك أبعد عنه وده غلط لكن بالطريقة دي قدروا أنهم يتقبلوا بعض رغم اختلافهم ..بدأوا يفكروا بإيجابية إزاي يحل المشكلة إللي هو فيها اتعلموا التعاون انا لوحدي مش هاقدر أعمل حاجة لازم أنا أتنازل وأنت تتنازل عشان نقدر نوصل لأرضية مشتركة ترضينا إحنا الإتنين
الحل في زيادة التقارب وليس البعد .
التربيه فن
