حب عالسريع
كلمات:محمدأبوالحسن
عم يابياع الورد
إدينى وردتين
ورده حمره وورده بيضه
فى حاجه تملا العين
واكتب على كل ورده
كلمه من حرفين
وارسم عليهم قلب
خليك راجل أمين
الورده البيضه
لحبيب طال غيابه
ولانعرف هو فين
والورد إحساسه عالى
وهيوصل علطول لبابه
طاير بغير جناحين
يمكن لما توصله
والورد كمان يقوله
نعرف مكانه فين
مش ممكن يكون حزين
واحنا اللى مقصرين
والورده الحمره
لحبيب تانى خد مكانه
وصبح فى نن العين
حب الزمان ده كده
يروح حبيب
ييجى بداله إتنين
والقلب له القريب
وإللى تشوفه العين
واللى عليها كل يوم
يصبح
بالورد واليايسمين
ويقول كلام يفرح
ويقدم القرابين
دايما ينول الرضا
ومنه مبسوطين
وان حب يوم يفارق
بدل البلوك إتنين
ماعدش معانا فارق
الحب فى البتارين
وبعده هنستبارك
بدل الحبيب خمسين
هو الزمان دا كده
إصحوا يابنى آدمين
إستنى يابتاع الورد
ياترى إنت روحت فين
مافيش عندى وقت
إدينى دستين
عشان يكفوا الحبايب
اللى حضروا والغايبين
