تميزك عن غيرك رزق من الله وليست شطارة

تميزك عن غيرك رزق من الله وليست شطارة
الكاتبة فاطمة المصرى
عزيزتى المرأة يجب أن تعلمى جيداً إذا كنت تتميزى عن غيرك بشئ فهى ليست بشطارتك هو رزق من الله لك وقد خلق الله تعالى الإختلاف بيننا لحكمة من عنده فى الدنيا فارجوكى لا تقارنى نفسك بغيرك وتتهمى من حولك بالتقصير لكل زوجة إليكى هذه النصائح:
-الزوجة التى تمتلك العديد من الملابس أشكال وألوان من فضلك لا تفتخرى أمام الأقل منك وتقللى منها مش بشطارتك ده رزق ربنا أعطهولك وحتى لا تزول منك النعمة لا تتهمى غيرك بعدم الإهتمام بنفسه ولبسه وشياكته لو تمتلك نفس المال كانت هتلبس مثلك وأفضل منك راعى المشاعر واحمدى الله واشكرى زوجك لإهتمامه بك.
-الزوجة التى تتميز بالقوام الممشوق من فضلك ما تعايريش الناس البدينة وإنك محافظة على الطعام الصحى والرياضة ممكن عندهم أمراض تمنع حرق الدهون ومشاكل صحية فى أى جهاز فى الجسم يسبب لها زيادة الوزن من فضلك راعى مشاعرها وركزى على نفسك.
-الزوجة التى عندها وقت فراغ تستفيد به فى ممارسة أنشطة أو هوايات شجعى غيرك ولا تلقى اللوم على إهمالهم لنفسهم ده رزق مش بشطارتك.
-الزوجة التى كان تعليمها باللغة الفرنسية أو الإنجليزية لو سمحتى احتفظى باللغة وما تتكلميش بيهم أمام سيدات كان تعليمهم عادى ده رزقك ما تزعليش غيرك وتحسريه على نفسه مش من الذوق إنك تستعرضى نفسك قصادهم وتقللى منهم مش بشطارتك ده رزق.
-والزوجة إذا أكملت تعليمك دراسات عليا ماجيستير ودكتوراة واستاذية وتعملى بمكانة مرموقة لا تستهينى بستات البيوت لإن ربة المنزل تعمل مجهود كبير فى نظافة المنزل وتحضير الطعام وطلبات الأولاد وتربيتهم ويخرج من يدها أجيال الدكتور والظابط والمهندس وغيرها من الأعمال العظيمة التى ضحت بنفسها وصحتها لرعاية زوجها وأولادها وأخيراً هو رزق
-الزوجة لوعندك شغالة وتتفرغى للعمل أو الدراسة فمن فضلك لا تعايرى السيدات الأخريات ليست بشطارتك ده رزق ربنا ليكى.
-الزوجة التى يهتم بها زوجها ويوفر لها المعيشة المريحة مادياً وعاطفياً ويحترمها ويسعدها هى وأولادها ده رزق مش شطارة منك احمدوا ربنا ولا تتهموا السيدات إنها مقصرة فى حق زوجها لذلك بينهم مشاكل كثيرة مادية وعاطفية وقد تصل إلى الإنفصال لا يا عزيزتى هى حاولت الإصلاح من أجل لم شمل الأسرة وتحملت مشاكله المادية ولكن لم تنجح فى حل مشاكلها فما تحمليهاش ذنب إنها لا تعرف تمشى أمورها جيداً ارحميها .
-الزوجة التى عندها وقت تعمل فيها كورسات كمبيوتر وإنجليزي ومنحة للسفر للخارج لا تلومى السيدات حولك إنهم لم يطوروا من نفسهم ربنا يسر لك ورزقك من فضلك ما تحطميش نفسيتهم ده مش شطارة منك ده رزق ربنا منحه ليكى .
-الزوجة التى تزوجت صغيرة فى السن وانجبت سريعاً وكبروا أولادها وهى مازالت شكلها صغير من فضلك ده مش بشطارتك ده رزق ربنا ما تعايريش السيدات التى تتزوج فى سن كبير ممكن ربنا يرزقها بأولاد صالحين عن أولادك أو زوج حنين وبيحبها ويسعدها أكثر من زوجك .
-الزوجة التى عندها أولاد بارين بيها وبيعاملوها معاملة طيبة ويسمعوا كلامها وبيذاكروا ومتفوقين ديه مش شطارتك ده رزق ربنا ليكى فى الدنيا من فضلك ما تسخريش من السيدات التى أولادهم تاعبينها ولا يسمعوا كلامها ليس قلة تربية أو تقصير فى تهذيبهم ديه مش بشطارتك ده رزق .
-الزوجة التى تعمل وتكسب بارك الله فى رزقك من فضلك إتعاملى مع زملائك وباقى العاملين بمعاملة طيبة ولا تسممى أبدانهم لا داعى للتحكم كونى مرنة فى تعاملك وتعاونى معهم باحترام .
-الزوجة التى عندها أولاد أصحاء من فضلك مرض أطفال غيرك ليس تقصيراً من الأم ده الصحة رزق مش بشطارتك من فضلك ما تحرقيش دم حد بأسلوبك المستفز وتقولى لو حافظتى عليهم ما يمرضوش.
-الزوجة المتكلمة جيداً حضرتك تملكى كاريزما عالية وعندك حضور وبلاغة فى الحديث ولباقة ولسانك فصيح من فضلك ما تعايريش غيرك إنه لا يستطيع أن يعبر فى حديثه ولو تعلمى سيدنا موسى عليه السلام لما دعا ربه دعا الله أن يحلل عقدة من لسانه ليفقهوا قوله وطلب أن يشد أزره بأخيه هارون لأنه أفصح منه لساناً وهذا يعنى أنه رزق وفضل من الله يعنى مش بشطارتك .
الزوجة الملتزمة من صغرها محجبة وبتصلى وبتبعدى عن كل شئ يغضب ربنا من فضلك ادعى لغيرك بالهداية لا توبخيهم ولا تسخرى منهم شجعيهم على كل حاجة بتعمليها من أعمال الخير وربنا يتقبل منك ومنهم .
-الزوجة التى عندها أهل طيبين بيحبوها وبيودوها باستمرار سواء إخوات رجالة أو سيدات أو أب أو أم أو خال أو عم من فضلك راعى الناس من حولك لو حد عنده مشاكل أسرية أو قاطع رحمه ما تعايريش الناس ادعى ربنا يهديهم لكن ما تحزنيش غيرك إن أهله مقصرين فى حقه راعوا مشاعر بعض كفاية تجريح وتؤلموهم .
-الزوجة التى تشكر فى معاملة زوجها ربنا يهدى سركم وما فيش داعى لتكدير الآخرين والزوجة اللى أولادها بياكلوا كل الطعام ويشربوا اللبن وبيذاكروا وبيناموا بدرى وبيسمعوا كلامها وأصحاء من فضلك ما تسخريش من الأمهات التى تعانى مع أولادها الزوجة التى تعمل وسعيدة وتكسب مادياً من فضلك لا تجرحى غيرك ربنا سبحانه وتعالى خلق لكل حد فينا رزقه إما صحة أو مال أو علم أو سعادة أوعزوة هى أرزاق وحكمة واختبار للجميع .