#الأم_العصبية مشكلة بتعاني منها معظم الأمهات وخصوصا لو كانت بطبيعتها عصبية من قبل الجواز ولكن قد يكون سبب العصبية أسباب كثيرة منها :-
الضغط النفسي الذي تتعرض له الامهات
وقلة النوم
وأيضا أعراض الدورة الشهرية
خوض الأم عمليات قيصرية أكثر من مرة وأخذها البنج الكلي أو المخدر الكلي أكثر من مرة تزيد من عصبيتها
والسمنة تزيد من العصبية
والمشاكل الزوجية
وقلة المال أحيانا والإحساس بالإهمال أو الوحدة وغيرها من الأسباب تجعل الأم تتعصب من أقل شيء وقد يكون تافه ويجعل الأولاد يزيدوا من اخطاؤهم لأنهم مش بتربوا صح
إزاي تقدري تحكمي بأعصابك وأنت في قمةغضبك ؟
لما تلاقي نفسك في قمة غضبك وابنك او بنتك عملوا مصيبة او حتى غلطوا غلطة صغيرة بسرعة سيبي المكان وروحي مكان تاني عشان ممكن تأذي ابنك بدون ما تشعري حتى ولو انتي هتزعقي بس او تسبيه ممكن كده يخاف منك ومع الوقت هيكرهك ويخاف يصارحك باي حاجة.
لما تلاقي أولادك بيتخانقوا مع بعض عشان لعبة خدي اللعبة واخفيها عنهم لحد ما يتعلموا الأدب ويعرفوا أنهم أخوات ولازم يتشاركوا فاللعب بدون ضرب
علاج العصبية على الأولاد:
ثبت علميا أن السجود أو الجلوس أرضا يحولك من مرحلة التعصب إلى مرحلة الهدوء فلو كنتي متعصبة جدا اذهبي وتوضأي وصلى ركعتين وهتلاقي أعصابك ارتاحت ولو عليك عذر شهري الدورة الشهرية اجلسي بالأرض واحنى رأسك فى وضع السجود الدم هيغذي المخ ويتدفق نحوه وهتلاقي أعصابك ارتاحت.
ماتخليش الأولاد دايما يشوفوكي متعصبة و مثل الوحش لأنك ممكن ماتشوفيش نفسك إزاي أولادك شايفينك جربي تنظري فى المراة وتشوفي نفسك عاملة إزاي حطي نفسك بدل الأولاد هما بيبقوا شيفينك وحش وعشان كده بيحبوا بابا أكتر لأنه مش بيبقى موجود معاهم وبيعاملهم بلطف خليكي زي اسمك مرأة يعنى أنوثة وأم وبلاش تعيشي دور الراجل العصبية من صفات الرجالة.
أنتي بتتعبي كتير عشان تربي أولادك ماتخليش عصبيتك تضيع تعبك لأن العصبية هتخلي الأولاد يخافوا منك ومش هيسمعوا الكلام وهيعندوا اكتر.
أوقات الصفا مع أولادك اشعريهم بحبك وحنانك لأن ده ممكن يقلل شعورهم أنك بتكرهيهم عشان كده بتتعصبي عليهم
اتعودي أن الضرب عمره ما هيجيب نتيجة لكن لو عملتيه يبقى استثنائي وحاجة بسيطة مش ضرب مبرح أو ضرب بأي شيء واعلمي جيدا أن الله يعطي علي اللين مالا يعطي علي الشده يعني النتيجه اللي عاوزه توصلي لها باللين هتكون أسرع. من اللي هتوصلي لها بالشده
ممكن الطفل يعمل مصيبة ونتعصب وننهار وممكن نضربه وهو أساسا مايعرفش أنها غلط وماحدش عرفه أو حذره من أن ده غلط خلي بالك أن الطفل لما بيعمل غلط مابيبقاش عارف أنه غلط هو بيجرب وخلاص فانتي ماتضربيهوش كده انتى بتعملي حالة فزع للطفل وبتخليه يجرب أي شيء ممكن يفيده مش عوزاه يبوظ حاجة شيليها من امامه أو عرفيه أن ده غلط
لو افترضنا أن ابنك رمى حاجة من الشباك وهو مايعرفش أن ده غلط أو سنه صغير أقل من 3 سنين لازم تفهميه بدل ما تتعصبي عليه
وأخيرا مشاكلك وأعصابك مش ذنب أولادك أنهم يتحملوها هما أطفال وبيتعلموا منك ولو فى حاجة متضايقة منها صلي واشكي لربنا أو أكثري الإستغفار أعصابك هتهدي وأطفالنا نعمة كبيرة وأمانة لازم نحافظ عليها وفى ناس مشتاقة لطفل ربنا يحفظ أولادنا
