تأخر الكلام عند الأطفال في عصرنا ده بقى سمه أساسية في أي طفل و كتير من أولياء الأمور بيقلقوا و بيسألو السؤال الشائع :
أمتى أعرف أن ابني متأخر في الكلام ؟ او
“ابني عنده سنتين او ثلاثه و بيتكلم كلمات بسيطة
زي(بابا – ماما – جده – امبو – مم )
هل كده متأخر في الكلام ولا ايه ؟؟ و لو متأخر اعمل ايه ؟؟
**الإجابة أنه أكيد متأخر لغويا …. و عشان نعرف ليه أتأخر لازم نعرف حياته شكلها ايه ؟؟
يعني…
– هل لما بتندهي عليه بيبصلك و ينتبهلك ؟؟
– هل بينفذ أوامر أول ما تقولي و بيبقى فاهمك ؟؟
– هل بتنفذي طلباته قبل ما يتكلم أو يشاورلك عليها حتى ؟؟
– هل بيشاور على طلباته او بياخدك من ايدك عشان تلبي طلبه ؟؟
– هل بيتفاعل مع الاخرين و الأطفال اللي زيه ؟؟
– هل بيتفرج على التلفزيون أو ماسك الموبايل على طول ؟؟
– هل بيروح حضانه ولا لأ ؟؟
و بعد ما نجاوب على الاسئلة دي كلها طبعا فيه سؤال مهم جدا و هو إذا كان فيه مشاكل صحية قبل او أثناء أو بعد الولاده ؟؟
طبعا لو فيه مشاكل يبقى كده عرفنا سبب التأخر إيه و هنا هيبقى محتاج فريق عمل يشتغل معاه من تنمية مهارات و تخاطب و تخصصات تانيه إذا تطلب الأمر…
** ليه التلفزيون و الموبايل و التاب لأ ؟
الإلكترونيات و تأثيرها على نمو اللغه عند الأطفال :
حضرتكم بتسيبو الأطفال قصاد التلفزيون أو الموبايل بالساعات و مش مقدرين أن ده سبب رئيسي من أسباب تأخر نمو اللغه عند أولادكم و بيحولهم لشخص مستقبل بس يعني معندوش فرصه أنه يعبر…
الإلكترونيات بشكل عام بتسبب تأخر في نمو و تطور اللغه – تشتت في الإنتباه – تعلم سلوكيات سلبية
عشان محدش يقول بتجيب “توحد” !!
**لو مضطر تفتح التلفزيون يبقى ساعة واحدة تكفي تقسم على مدار اليوم و يا ريت تعطى كمحفز قبل المذاكرة او بعد المذاكرة أو مراعاة توقيت تقديمها( بلاش وقت الأكل يتفرج على الكرتون)
إختاروا محتوى البرامج اللي بيشوفها الطفل و تقسموا الساعة على مدار اليوم بالكامل متبقاش ساعه متواصلة و متسبوش الطفل يتفرج لوحده يا ريت يبقى معاه حد و يشرحله اللي بيحصل في الكرتون و خلي فيه مناقشة بينكم يعني تسأليه إيه اللي بيحصل؟؟ أو أنت شايف إيه؟؟ أو هو عمل إيه؟؟ خلي يبقى فيه تفاعل بين الطفل و بينك في موضوع الكرتون اللي شغال …
**اعمل إيه لما اتأكد أن ابني طفل متأخر لغويا ؟؟
– لازم الطفل ينزل حضانه حتى لو “عمره سنه و نص” عشان يبدأ يتعلم إزاي يتفاعل مع الأطفال اللي زيه و الآخرين. “حضانة كويسة متركنوش قصاد تلفزيون”
– يتعمل تقييم لغوي ( إختبار لغه ). *إذا كان عنده محصول لغوي من الجمل من كلمتين
– يتعمل إختبار ذكاء.( أفضل عمر لتطبيق إختبار الذكاء من 4 سنوات اذا كان الطفل عنده محصول لغوي يقدر يعبر بجمل”
– يبدأ جلسات تخاطب. “من جلستين إلى 3 جلسات في الأسبوع أو مكثف و مدة الجلسة من 30 الى 45 دقيقه” و ده بيحدده الأخصائي على حسب قدرة الطفل في التحصيل و الاستيعاب
– إرشاد أسري ( ماما هتعمل ايه معاه في البيت ) و ديه اللي عليها عامل كبيير في سرعة تطور الطفل .
**ماما هتعمل إيه في البيت ؟؟
– لازم نمنع التلفزيون و الموبايل و التاب و أي اليكترونيات.
– لازم تتكلمي معاه كتير و توصفي كل الأحداث خلال اليوم. ” كوني له مدحت شلبي يكون لكي أبو تريكه و يبدع فالكلام ”
– و أنتي في المطبخ توصفي كل حاجه بتعمليها أغسل طماطم أقطع طماطم طماطم شكلها مدور شكلها دايره أكل طماطم و هكذا في الخضروات و الفواكه و الطعام و المشروبات)
-أخري استجابتك له لما يطلب بالإشاره و حفزيه للكلام ديما يعني هتعملي إنك مش فاهمه هيشاور على مايه قولي عايز ايه ؟ هيشاور على مايه قولي عايز ا3يه تاني مش فاهمه ؟ هياخدك من إيدك لحد المايه قوليله اااه مايه عايز مايه او اشرب و بعدين يشرب شويه و نرجع نسأل دي ايه ؟ و نرد مايه حتي لو مكنش فيه استجابه منه عادي مع التكرار و التدريب المستمر هتلاقي نتيجه
– لازم يبقى فيه اوامر كتير و ينفذها و تحفيزه على الكلام. “مهم انك تكوني واثقه انه فاهم الطلب و الأمر عشان يقدر ينفذه”
– الاوامر البسيطه زي (هات – خد – افك – اركب – تعالى – روح – اقف – اقعد – اطلع – انزل – افتح – اقفل )
– نشتغل على مهارات ما قبل اللغه زي ( اصقف – ارفع ايد فوق – انزل ايد تحت – اخبط على ترابيزه )
– يفضل انه يندمج مع البيئه المحيطه حواليه و لما ينزل الشارع مع ماما او بابا طول ما احنا ماشين نسمي الاشياء حوالين الطفل زي (دي عربيه – دي قطه – ده كلب – ده حصان – دي طماطم – ده موز – ده لون احمر اصفر ازرق و هكذا)
– لازم انشطه كتير زي بازل – صلصال – مكعبات – خرز و خيط – لوحة الدبابيس
**مجموعه من الفتاوي اللي ملهاش اساس من الصحه..
-خلي الواد يقعد قصاد التلفزيون و هو هيلقط و يتكلم منه
-إدي (اعطي) الواد دوا سبيك سموث و هو هيبقى زي الفل
-الاوميجا 3 هيخلي الواد يتكلم بسرعه “بعض انواع الاميجا بتخلي الطفل عنده هايبره”
-التطعيمات بتخلي الواد يتأخر في الكلام
-جلسات الاكسجين المضغوط في بعض الحالات غير مجديه
**اللغه بتنقسم الى قسمين :
اللغه الاستقباليه : هي المحصول اللغوي او الأشياء اللي يقدر يتعرف و يشاور عليها الطفل (التعرف)
اللغه التعبيريه : هي المحصول اللغوي او الأشياء اللي يقدر يسميها باسمائها (التسميه)
**تطور لغة الطفل الطبيعي حسب عمره :
في السنه الأولى من عمر الطفل :هي فترة مناغاه و تكوين مقاطع صوتيه
من عمر سنه إلى سنتين : يبدأ يقول كلمات مفرده و جمل بسيطه من كلمتين
من عمر سنتين إلى الثلاث سنوات : بيكون جمل من كلمتين إلى ثلاث كلمات زي ” عايز اشرب مايه ”
من عمر ثلاث الى أربع سنوات : بيكون جمل من ثلاث كلمات و جمل حواريه
من عمر أربع الى خمس سنوات: بيكون جمل حواريه و ضمائر و صفات و يحكي قصه
من عمر خمس الى ست سنوات : فهم الجمل البلاغيه و اكتمال اللغه…
