د /إيمان سرياقوسي
الضياع الأخلاقي مش بس قِلّة دين و انعدام وعي و ثقافات ظهرت كغزو ثقافي ده كمان إحنا لنا يد فى كده
البيت ثم البيت ثم البيت ..انعدام الحوار في البيوت ..الأم بطلت تتكلم مع اولادها ..وفشلت إنها تصاحبهم ….والأب مشغول بشغله ..
انتبه واياك ان تسمح بكده
مجرد ما ابنك أو بنتك بدأ يقفل على نفسه باب أوضته اعرف ان في بداية لمشكلة عندك في بيتك …
ابنك مش بيقفل باب اوضته وبس ..ابنك بيقفل باب حياته بالكامل في وشك ..
بيعمل الفجوة وبيجهّز الفرقة بينك وبينه ..
باب اوضته خليه دايماً مفتوح بينك وبينه ..كل شوية ادخل شوف بيعمل ايه.. بيكلم مين .. بيسمع مين …بيشوف ايه !!
أتكلم معاه ..اعرف مين اصُحابهُ ..اتعرف عليهم ..اعرف مين الصاحب اللى هو محور حياة ابنك ..اللى كل ما بيرن عليه يطلع يجري يروح له ..
اسمعه أو اسمعها للآخر ..ما تقاطعش كلامه حتى لو كنت ضده ..صاحب ابنك او بنتك ..الغي موضوع الخوف منك أو الرهبة من الكلام معاك ..
افتكره بهدية حلوة من وقت للتانى كنوع من الثواب على خلقه الحسن أو على تغيراته الكويسة اللى لاحظتها بنفسك ..ادعمه زي ما بتعاقبه ..
قبل ما تسعى وتلهث في الحياة عشان توفر له فلوس و مستقبل.. قبل ما تأمنه حياتياً ….أمن رجولته أولاً ..علّمه ازاى يبقى راجل في الأفعال والسلوك والكلام …أمن عقله و تفكيره وضميره من الخراب اللى حواليه …
ما تفتكرش إنّك لما تلبي كل احتياجاته كده انت بتحميه ؛ أو بتعززه ؛ انت ممكن تضره لو ما حسستهوش انك بتتعب عشان تعيشه الحياة الكريمة اللى يستاهلها …
ما تسمحش لإبنك إنه يكون صوته زي البنات رقيق أو يفتح قميصه بشكل مبالغ فيه أو يعمل قصة شعر غير مقبولة بحجة الموضة ..
ما تسمحش لبنتك إنها تنطق ألفاظ خادشة أو جريئة أو إباحية حتى لو بهزار ..أو تلبس اللى يتناقض مع العادات والتقاليد بحجة إن اصحابها بيلبسوا كده و ترجع تشتكي من تصرفاتها ..
ما تسمحش للمبادئ تتهدم في بيتك و تتفاجئ بالكوارث جوه بيتك
عمر ما كان السفَه و الإنحلال و الفواحش ” open mind “
الراجل الحق اللى بيغير على أهل بيته ..والأم اللى بتتعامل بحذر و حرص وخوف على أولادها عمرهم ما كانوا جهلاءأو رجعيين .
احمي بيتك وأهل بيتك بالهداوة و باللين و الحوار وبالوقت المخصص لهم و لإستماعهم .
اشرك اولادك في اقتراحاتك و طموحاتك ..في مواضيعك ..في مشاويرك لو أمكن .
