اه يا وجع قلبى من داخل العنايه المركزه
بقلم هند الشيخ
اه يا وجع قلبى
سنين عمرى مفارقانى
وروحى بتتسحب منى
كل شريط الذكريات
حاضر ف ذهنى
كل اللى عشناه سوى
لحظه بلحظه بيراودنى
صوتك صورتك ضحكتك
براءة الطفله الجميله
صوتك لما بتغنى لسومه
فاكره يا امل سومه
فاكره البحر
وحكاوينا الجميله
لسه البحر سألنى عليكى
أرد بأيه
شاورى حتى طمنينى
خايفه تكون النهايه
وخايفه تخلص الحكايه
طب ليه المره دى
صوتك هزيل
ولونك شاحب ويشبهنى
وليه انينك زاد وجع
وليه وجعك المره دي
زاير تقيل
يادنيا كل ما فيكى عفن
كل اللى فيكى محن
حتى السعاده مكدره
وكل فرحه بتديهالنا
بتاخدى منا اكبر
ماعدت عايزه منك شىء
هما يادوب مترين قماش
يجمعونى بيها ف الكفن
