بقلم / د تامر احمد
في اواخر السبعينات كان من المعتاد وضع يافطة في الاماكن المعروفة بازدحامها مكتوب عليها احترس من النشالين .
و الحقيقة ان اليافطة دي كانت مفيدة جدا للنشالين .. ايوة انت قريت صح مفيدة جدا للنشالين فعلا
طب ازاي ؟
ببساطة لأن التحدي الاساسي اللي بيواجه اي نشال هو انه يعرف يحدد الجيب اللي فيه الفلوس او المحفظة علشان يسرقها و الحقيقة ان الناس لما كانت بتعدي عند لوحة احترس من النشالين كانوا لا اراديا بيحطوا ايديهم على الجيب اللي فيه الفلوس علشان يطمن انها في مكانها و ما اتسرقتش و طبعا ده كان بيسهل مهمة النشال في انه يعرف هدفه بالتحديد لدرجة ان بعض النشالين كانوا بيحطوا بنفسهم لوحة احترس من النشالين.
و في حياتنا ممكن نقابل نوع من البشر نشالين برضة بس مش بيسرقوا منا شئ مادي لكن ممكن جدا يسرقوا فرحتنا .. حلمنا .. راحتنا و حاجات مهمه كتير
و الحقيقه عزيزي القارئ ان احنا احيانا بنكون مسؤولين و بشكل كبير عن عملية السرقة دي بأننا بنتكلم عن الاشياء الغالية في حياتنا ( اشخاص ، احلام ، حب ، شغل ) و بالتالي بندي فرصة كويسة للنشالين لمعرفة و الوصول ليها بسهولة.
و زمان قالوا لسانك حصانك ان صنته صانك فصون لسانك عزيزي القارئ و من فضلك انتبه بتقول ايه و بتقوله لمين و احتفظ بأحلامك و فرحتك لنفسك و للدايرة القريبه منك.
بأختصار احترس من النشالين
بدل ما تجري وراهم و تقول امسك حرامي.
