امريكا لما تفلس

كتب  فوزي الحبال

ترامب بيشوح لرئيسة الكونجرس ، ورئيسة الكونجرس بتردحله ، والجمهوريين معارضين الديموقراطيين ، والديموقراطيين معارضين ترامب ، اللي هو تلاقيهم مقطعين بعض ، طب عيب يا إخوانا إنتوا واكلين نايمين سارقين قاتلين مع بعض .
بس اللي هيقرب من امريكا ، ولا لو ترامب قال هنحط على دولة فتلاقيهم كلهم حاطين معاه .

طب إيه الحكايه ، كل الحكايه إن امريكا دي من زمان عامله زي صندوق الدنيا ، وقرب قرب عندنا الديموقراطيه وعندنا الإستثمار وعندنا الدولار بيولد مليون وحط فلوسك عندنا أضمن ، فكل الدول ومنهم الخليجيه حطت كل الصناديق السياديه عندهم وكل الحكومات وكل رجال الأعمال ، وطول ما إنت بتحط فلوسك عندي إنت حبيبي وابن بنت بنتي ، لكن اول ما تقولي عايز فلوسي ، ها ادخلك فيلم العار .
و هقولك التخزين شغلة الدفاس وأبودهشوم ، وفلوسك راحت في الملاحه والملاحه الملاحه وحبيبتي لابسه الطوراحه .

الصين لها ديون عند امريكا بترليونات وحبت تقلبها في كام ترليون بحجة إن كرونا من عندهم ، الصين وقفتلهم و قالولهم طب نحقق في الموضوع والدفاتر دفاترنا والمحققين محققينا .
و قالولها طب الفيروس كان عندكم وإنتم مخبيينه علينا وكدا عيب ، وإدونا شوية فلوس وإحنا هنسكت ، الصين قالتلهم ولا دولار هتشوفوه ولو صادرتوا فلوسنا هنأمم مصانعكوا اللي عندنا .
وراحت امريكا مقلبه إيران وكوشت على فلوسهم علشان بيلعبوا بالمسافات طويله .
وطلعوا ل سوريا قانون قيصر وراحت مقلباهم في اللي باقي ليهم .
طول عمري بسأل السؤال ده ، ليه الدول الخليجيه ميحطوش فلوسهم ويستثمروها في مصر ؟
وأهو تبقا جمبهم ومضمونه ، إنما تقول إيه بقي !
قطر بتمر بأزمه إقتصاديه ، الحصار الإقتصادي من ناحيه ، والكورونا من ناحيه ، وانخفاض سعرالبترول ، وراحوا مخفضين الرواتب 30 ٪ و قالوا لا بقا إحنا نميل على امريكا وناخد من تحويشتنا وشقى عمرنا ، فامريكا قالتلهم ملكوش فلوس عندي يا عنيا إنتوا بتمولوا الجماعات الإرهابية و إتهمتهم رسميا إنهم بيمولوا الإرهابيين .
هل امريكا بتكره قطر ؟
لا يا حبيبي امريكا دي عامله زي النصاب اللي كل ما ميلقيش معاه فلوس يروح مقلب اللي حواليه .
الله طب ما الراجل الطيب اللي إسمه عبدالفتاح السيسي صوته إتنبح من 201‪3 وهو بيقلكوا قطر بتمول الارهاب وبالمستندات كمان ، قالوله لا معلش يا سيسي إن بعض الظن إثم .

السيسي قال لقطر ، فطار وغدا وعشا الشعب المصري في يوم واحد يأكل قطر لمدة سنه ، طب والله لو إحنا جبنا عربية فول واحده من اللي بتقف قدام القصر العيني لتفطر قطر كلها .

وطلع قانون جاستا للسعوديه وقالهم إنتوا و رجال أعمالكوا اللي بتمولوا القاعده ، ولا ليكم عندي فلوس .
الكويت بقا قصه تانيه خالص ، لا طالوا صندوقهم اللي في ماليزيا علشان إتنصب عليهم فيه من رئيس البنك المركزي بتاعهم ووزير الإستثمار بتاعهم البنجالي ولا طالوا اللي في امريكا ، وتم دمار الإقتصاد الكويتي .
مين بقا المعلم في القصه دي الراجل اللي إسمه عبدالفتاح السيسي ، من كام سنه قال للإمارات خدوا بالكوا علشان امريكا هتكوش على كل الصناديق السياديه لكل الدول واللي هينطق امريكا هتلبسه تهمة إرهاب .
الإمارات عملت صندوق سيادي مع مصر وحطت فيه شويه من التحويشه وعلشان كدا هتلاقي مشاريع كتيره باموال إماراتيه مشاريع طبيه وزراعيه وصناعيه وموانئ دا مش علشان خاطر سواد عيون مصر ، إنما هي منفعه متبادله وفلوسهم كدا في المضمون .
الرئيس السيسي بقا حب يغشش المعلومه دي للسعوديين ، إنما مكنوش مقتنعين شويه ، بس محمد بن سلمان لما إتعمل لهم قانون جاستا ، فهم اللعبه بس كانوا خلاص دخلوا في النفق ، و حب ينقذ ما يمكن إنقاذه وسحب شوية فلوس وعمل أضخم مشروع إستثماري متكامل في العالم اللي هو مدينة نيوم بين السعوديه ومصر والاردن ، ودا بتمويل الصندوق السيادي السعودي واهو كدا فلوسهم مضمونه في كذا دوله .
أمريكا دي ماشيه بمبدأ المصريين اللي هو أنا وأخويا على إبن عمي وانا وإبن عمي ع الغريب .

القادم اجمل بإذن الله تعالى حفظ الله مصر وشعبها وجيشها العظيم وقائدها رجل المخابرات .