النسيان

كتب عزة ابوالسعود العسيري

محدش فينا بيقدر ينسي ، مبيقدرش ينسي اللي كسره ، واللي خذله ، ولا ينسي اللي كان سبب ف ان قلبه يبقي فاضي، ولا ينسي اللي كان سبب ف ان يظلم ناس كل ذنبها انه حبته …. النسيان دا تقريباً من الحاجات الشبهه مستحيله ، لان مهما يفوت عليها، بتيجي لحظه ، كلمه اترمت ف وسط قعده ، مكان ، اسلوب او طريقه ، بتفكرك . ودا مش حاجه وحشه علي فكره انك متنساش ، اه بتتوجع ف كل ثانيه بس المفروض الحاجه دي تقويك ، دايماً الكسره لازم تحولها ل حاجه انت بنفسك تخلي اللي قدامك يندم انه سابك. عارفه ان صعبه كسره القلب ، بس ربنا معاك وعارف وعالم بكسره قلبك ، وقادر يرزقك باللي ينسيك همك ،ويرزقك بالفرحه اللي تخليك تقول الحمدلله ، كل اللي حصلي دا عشان ربنا يرزقني بالفرحه دي . ربنا كريم اوي ، خلق فينا النسيان ، اه مش زي ما بنبقي عايزين بالظبط نمحي الحاجه خالص ، بس الجزء اللي انت مش قادر تنساه دا ، يمكن رساله من ربنا عشان يقولك شفت حصل فيك ايه ، وانا رزقتك ب ايه ، انسي . انسي الهم والقرف، والكسره . هما اللي خسروك ، انت اتمسكت بيهم ، ووثقت فيهم، وعملت كل حاجه عشان ترضيهم ، يبقي انت تنسي ، وسيب امرك ل ربنا ، قادر انه يخليهم يجي يوم يتمنوا يعدوا بس من قدامك . ربنا خلق نعمه النسيان ، والجزء اللي منستهوش دا يقويك مش يكسرك بقولها تاني وهفضل اقولها ، متوقفش حياتك ع ناس اتخلوا عنك ، عن ناس بتاخد منك وبس لحد ما خلتك فاضي ، انت تستاهل تفرح .