القصيدة في ديوان ترتيل الفوشيا لأنواع الحب للشاعر…… ناجى عبد المنعم

القصيدة في ديوان ترتيل الفوشيا لأنواع الحب

للشاعر.. ناجى عبد المنعم

كتب لزهر دخان
أنــا وانــتى
أنا وانتى كَـيَـان واحـد
وِرُوح واحـده

وقلب كبير يِسَاع الكـون –
فى كام دَقَّـه

أنا وانتى ربيع واحد
وصيف واحد

شِتا واحد
ربيع أخضر

يِـلَـوِّن زهـرة المشمش –
يِـلَـبِّـسْـها الحرير

والـتُّـل والسُّندس
وصيف واحد

يِـجَـرَّد زهـرة البَانْـسِيه
من اوْراقها

تِـبَان وف عِـزِّ عِـزِّالحَـرِّ
كالنسمه –

تِـهَـفْـهَـفْ ع الخُـدود
وِتْـشِـعْـلِـل الحُـرْقَـه

فى قلب يْـحِنِّ للمعـنى
فى قـلب يحن للدقه

شتا يِـوَشْـوِش
نَسِيم البحر يِـتْـصَاعِـدْ

فى قلب السِّيل غُـنا فـيروز
وِيِـنْـزِل فـوقـنا ليل الـوَجْـد

ألقاكى.. وتلقينى
حبيبة قلبى أرجوكى

بلاش تِـبْـقِـى
فى يوم لَـيْـلَـى ولا جولييت

لإنى عمرى ما هاكون لك
فى توب روميو ولا المجنون

أنا شاعـر.. بحبك آه
أحبك همسه فى ودانى

أحبك لمسه تسقينى
فى لحظة شوق وحِـنِّـيَّـه

عبير الحب
أحبك بنت جِـنِّـيَّـه وننوسه

وروح القلب وشقـيَّـه
وعـفـريته

تهدهـد قلبى م الحُرْقه
وتسكن قلبى وِعْـنـَيَّـه

أنا وانتى كيان واحد
كونى لى الشمس أبقى لِـكْ

نهار واضح بلا تزيـيـف
كونى لى الفكر

أبقى لك
كلام طيب

بدون تحريف
أنا عايزك كما النسمه

تِـرُدِّ الروح
ولو مَسِّ البكا والنوح

رموش قـلبى
تكونى الحب والبسمه

أكونك لو تكونينى
ونصبح فى

الهوا قلبين
فى قلب كبير

أنا وانتى

_____________________
من ديوان
ترتيل الفوشيا لأنواع الحب
( صدر منه ثلاث طبعات )
للشاعر ناجى عبد المنعم

———————————-