إعداد و حوار / محمود ممدوح
الشاعر الشاب احمد ابراهيم ابن محافظة الاسماعيلية طالب بكلية التجارة شعبة ادارة اعمال استطاع من خلال موهبته وكلماته غزو عالم الفن والكتابة والتأليف للعديد من نجوم الغناء والطرب أمثال المطرب بهاء سلطان و احمد سعد وتامر عاشور ومصطفى قمر
وفى حوار خاص لجريدة المصري الديمقراطي يروى لنا الشاعر والمؤلف احمد ابراهيم مشواره واخر اخباره وأعماله الفنية القادمة.
– متى اكتشفت موهبتك ومين اللى اكتشف فيك ده وشجعك ؟
من طفولتي – انا بكتب من ابتدائي لكن مش شعر لأ قصص من خلال مواضيع التعبير و اول حد خد باله من ده مُعلمتي في الابتدائي ومن اول الناس اللي شجعتني علي ده ؛ بعدين مرحلة الاعدادي بدأ الموضوع يبان في بعض الخواطر الرومانسية او خواطر في حب مصر ؛ لكن بدأ يبان الموضوع جدا في اول سنة ليا في الكلية بعد ظهوري في اول حفلة ليا كموهبة صغيرة ؛ من وقتها وانا بشتغل علي نفسي خمس سنين لحد ما ربنا كرمني بالوقوف علي معظم مسارح مصر والتكريم من عشرين جهة مختصة بالحركة الادبية في مصر ولله الحمد .
– كلمنا اكتر عن اعمالك المطبوعة ؟
انا ليا ثلاث تجارب اتمني يكونوا اتحبوا من الناس ؛ (جرامافون) ده ديوان شعر ليا ومن ثم (اخر ديسمبر) مروراً ب (مافيش فايزة) اخر اعمالي المطبوعة ؛ وانا مابميلش لفكرة الاعمال المطبوعة الا للتأريخ فقط لاغير .
ابن صاحب الكشك لقب بتعتز بيه جدا – ليه ؟
من اقرب واهم الالقاب لقلبي .. الكشك ده هو اللي طلعني راجل وهو اللي وراني كل التجارب اللي ٱثرت فيا قدام – ذاكرتي الانفعاليه بتستحضر طول الوقت مواقف مرت عليا في الكشك … الكشك ده مصدر رزق والدي العظيم اللي من خلاله فاتح بيت كله نماذج مشرفه لله الحمد .. فعمري ما هنكر الفضل للمكان ده ودوره ودور والدي في حياتي مهما حصل .
الفنان أحمد سعد الكل يعرف مدي العلاقة القوية مابينكم سواء في الشغل او بره الشغل ممكن نعرف منك ايه السر في ده ؟
السر في ده الصدق .. هو فنان صادق وانا بكتب كلام صادق ودى نقطة التلاقى الفنى اللى جمعتنا وده بتوفيق ربنا و اخلاصنا للشغل وده على المستوى العملى
وعلى المستوى الشخصى احمد سعد من اطيب وانضف الناس اللي الواحد ممكن يقابلهم في حياته وعمري ما انكر دوره وتٱثيرة في حياتي الإنسانية و المهنية .. احمد اول واحد اتاحلي فرصة التواجد اول اغنية كتبتها في السوق كانت غناء والحان العبقري احمد سعد .وان شاء الله الفتره الجاية هتسمعوا شغل جامد جدا في الالبوم بيني و بينه يارب يعجبكم
– سمعنا عن خلافك مع احمد كامل علي اغنية (للأسف) ممكن تحكيلنا التفاصيل ؟
خلاف مع احمد كامل !! لأ طبعا مش حقيقي احمد كامل صديق و اخ عزيز وفنان مجتهد وجميل وانا بحبه مافيش بيني وبينه ابدا اي خلاف .. اما بخصوص اغنية (للأسف) هي بس اتأخر نزولها لسبب انا ماعرفوش بصراحه بس اكيد مش هتصرف في الاغنية ككلام قبل ما ارجع لاحمد كامل في بيعها لمطرب تاني من عدمه .
– كلمنا عن تجربتك بالتعاون مع النجم تامر عاشور و حابين نعرف تفاصيل عن الاغنية !
طبعا سعيد بشكل مايتوصفش بالتجربة المهمة دي لان تامر عاشور فنان اوي ومستمع اوي ومتذوق جيد جداً يعرف قيمة الكلمة كويس و اكيد الشغل معاه خطوة ممتازة اتمني تكون موفقه والاغنية تتحب من الناس – ماقدرش احرق تفاصيل اكتر من اللي اتعرفت حالياً هي اغنية دراما من الحان سامح جلال و توزيع العبقري فهد ان شاء الله تعجب الناس .
منشوراتك بقالها فترة عن الفنان بهاء سلطان هل ممكن نفهم من كدة ان احنا هنشوف اغنية من كلماتك بصوت بهاء الفترة الجاية ؟
بهاء سلطان نجم كبير جدا ومن احب المطربين لقلبي وهو اهم صوت مصري حصل في العشرين سنه الاخيرة ، كلامي عن بهاء سلطان بدافع الحب والدعم قبل اي حاجة في الدنيا ، لما اتقابلنا واتكلمنا اكتشفت قد ايه هو انسان جميل زي صوته بالظبط وحساس وذوق جداً .. اما عن تفاصيل التعاون المشترك فخلي كل حاجة بوقتها وان شاء الله تسمعوا اخبار حلوة .
– اخيراً ايه اخر اخبارك الفنية ؟
ان شاء الله البوم الفنان احمد سعد ب ٣ اغاني من الحان احمد سعد وانتاج شركة مزيكا و اغنية سينجل تحمل طابع المقسوم مع الفنان مصطفي قمر و اغنية في البوم الفنان تامر عاشور .
