الحمام المحشي أرز بالكبد والقوانص

الاول هنغسل الحمام كويس جدا بخل ودقيق وليمون
وبعدين هتورقي الحمام يعني تفصلي بصباعك بين الجلد والصدر بتاعه بالراحة جدا وحوالين الرقبه والجناحات بترجعيها لورا ،
الكبد والقوانص هنغسلها برضو كويس وهتتقطع قطع صغيرة،
هنبتدي نجهز الحشوه،
الحمامة الواحدة بتحتاج رز ملو كف ايدك وطبعا بصل مفروم وملح وفلفل وقرفه والسبع بهارات
في حلة فيها سمنه علي زيت شوحت نص كمية البصل وانا بحب احمره زياده عشان يديني لون حلو للرز وبعدين بنزل بالقوانص الاول واشوحها شويه مع البصل واحط حبهان وورق لورا وفلفل اسود ورشة قرفه وبعدين بحطلها شوية مياه صغيرين واهدي عليها عشان تستوي شويه لان القوانص بتبقي ناشفه عن الكبد
بعدها بنزل عليهم بالكبده واشوحها وبعدين الرز المغسول اشوحه شويه واحط الملح والفلفل وسبع بهارات دي بتدي ريحه تحفه للخلطه
وبعدين بحط نص كمية الرز مياه سخنه واول لما يتشرب بغطيه وبهدي عليه واسيبه حوالي ربع ساعه
انا بحب اسويه نص سوا عشان ميزدش اوي جوه الحمام ويخليه يفرقع ،
نص كمية البصل اللي شيلتها الاول بدعكها مع ملح وفلفل وبعد مرفع الخلطه من ع النار بقبلها معاها الخطوه دي بتخلي ريحته الخلطه وطعمها حلو جدا
بسيب الخلطه تبرد وبعدين ابتدي احشي بين الجلد والصدر ومن عند الرقبه وجوه الحمامه طبعا ومتتمليش اوي يعني متبقاش منفوخه عشان متفتحش في السلق وبكتف الرجلين يعني تدخليهم في جلد الحمامه من تحت عكس بعض عشان تقفلي علي الحشو،
في حله فيها مياه بتغلي بحط بصل ٤ ارباع وطماطم وورق لورا وحبهان ومستكه ،
وبنزل الحمام علي ضهره وتكون المياه بتغلي كويس جدا وبسيبه يغلي علي نار عاليه غلوه واحده وبعدين بهدي عليه خالص واسيبه يستوي والملح بحطه لما يدخل في السوا ،
بياخد من نص ساعه لساعه الا ربع بالكتير وبيكون استوي،
اول لما يستوي بتصفيه كويس وتطلعيه من الشوربه ولما يهدا تحمريه في زيت غزير سخن
وطبعا جنبه ملوخيه ورز وبالهنا والشفا.