أجمل ما تعلمته فى التربية حاجة
أنك تربى الطفل على أنه يحس بالجمال ..وده هيفيد إزاى
هيحس بجمال الدولاب وهو مترتب …فيه أطفال أصلا ماتحسش بالفرق بين النظام والكركبة
هتحس بجمال تذويق الطبق ..فيه ناس بتاكل وخلاص يعنى تأكل
هيحسوا لما المطبخ يبقى جميل ومترتب فيصعب عليهم يوسخوه
للأسف أمهات كتير بتفتكر أن ده مش محتاج تعليم محتاج نضارة
لا الموضوع محتاج فعلا تعليم
شاركى ولادك ترتيب اوضتهم وتذوقوها وخليهم يصوروها بالموبايل
قسمى الاوضة أركان …الدواليب …السراير ..السجادة …المكاتب…. الألعاب ….الستاير وصورى كل ركن وهو مترتب زى ماتعوزيه بالظبط واطبعيه ألوان مش هتتكلفى خمسة جنية
وعلقى الصور فى الاوضة فوق كل ركن (ده الأجمل) قوليها كدة
انتى عارفة كل ماهييجى يكركب عينه هتقع على الصورة فيحاول يرجعها لاصلها
قوليلهم عاوزينها دايما فى (أجمل صورة) قوليها كدة
ماتزعقيش لو كركبوا ..بس تابعى وانقذى الموقف فى أوله ماتسيبيش الموضوع يتدهور أوى وتبقى مهمة إعادة الأمور لاصلها (الأجمل)صعبة عليهم
الكلام بهدوء
المدح والإعجاب
البعد عن الألفاظ السلبية
تلات أسرار لنجاح خطتنا
وانتى قدها
شاركيهم …..جملوا …صورى …اطبعى ….تابعى ….لازم الخطوات دى تتعمل ورا بعضها عشان الجمال يتغرس بمشاعر حلوة وفرحة
إنما لما تفضلى تبكتى فيهم وتقولى
أهو كده …فيها إيه لما الاوضة تفضل كدة ..فيها إيه لما تحسوا بالجمال ده ..اسمعى كده الكلام بنفسك هتلاقيه كلام غلس
وساعتها الجمال هيتخزن بمشاعر سلبية فيهربوا منه أصلا..
