احنا مش بنمر بالايام الايام هيا اللي بتمر بينا ودايسه علينا كلنا
احنا مش بنمر بالايام الايام هيا اللي بتمر بينا ودايسه علينا كلنا
كتب _ طارق البدري
يوم جديد تصحي الصبح تلاقي نفسك واقف قدام يومك الجديد و بتكلمه وتقوله عندي مشواير و مواعيد كتير ياتري هالحق اعمل فيك ايه ؟ بقولك ايه يايوم مابلاش تعدي النهارده بسرعه زي كل يوم خليك انت مختلف عن اخواتك الايام
– رد عليا بغلاسه لا هاعدي
– مممم طب هدي شويه وانت بتعدي ابوس ايدك ده انا عندي مشواير كتير.
– انا مالي انت وسرعتك وبقي .
– طب ارجوك تعالي علي العصر كده وريح شويه
– لاترجوني ولا ارجوك انسي حاسب شويه كده بقي علشان عايز اعدي .
– استني بس هو انت بتعمل معايا كده ليه اشمعني انا ده انا بشوفك مع الناس اللي علي القهوه بتعدي في تلات ايام وبشوفك واقف بتتفرج علي وجع العيان ومش عايز تتحرك ولا فارق معاه آلمه وبشوفك مع النايم نايم جنبه وكانك مش عايزه يصحي و بشوفك وسط المدافن قاعد ومتبت وسط اهل الميت ومش عايز تمر وكانك شمتان فيهم وفي ميتهم وبشوفك مع المكسور من حبيبته والموجوع في قلبه مبتتحركش وكأنك فرحان بوجعه وكسرة قلبه انت ليه مع كل واحد موجوع بيقول امتي اليوم ده يعدي مبتعديش ومع كل واحد سعيد بتعدي في لمح البصر ليه في الموت و الحزن والهم والغم بطئ وفي الحياه و السعاده والفرح بتعدي في لمح البصر ليه بتعمل معايا كده ليه ؟
– بصلي و قالي يا أخي ! هو انا يوم ندل يا أخي يوم مؤذي يوم بيحب الكسل و الهم والغم والوجع اكتر من الشغل و الفرح والسعاده وطول ما انت فاهم ان انا اللي كده يبقي عمر يومك ماهايعدي
و سابني ومشي بعد ما عدا ساعتين منه و انا لسه واقف مكاني ومازلت.
