بقلم الشاعر /أشرف فتحي عبد العزيز
خلص العيد اللي قالوا عنه (عيد الحب) عايز اعرف بيمثل إيه للناس اللي احتفلت بيه.. هو خروج وهدايا وانتهت القصة..!
قبل يوم العيد مكنش في حب بنكم كانت المشاعر صفر والأحاسيس بنكم مفيش والقلب طفشان ولا فارق معاه..!
وبعدالعيد لقيتوا بعض وملكتوا الدنياء وزهدتوا الحياة علشان انتوا كفاية لبعض عن العالم ده…!
الناس اللي احتفلت بيه زود عليكم إيه وعاد عليكم بإيه وفرق معاكم بإيه ولأ اهم ما فيه الخروج والهدية وشوية فرح وخلص الكلام ووقفت تاني الحكاية…!
الحب اللي بالشكل ده مش حب.. علشان تحتفل بحاجة مش بتمثل ليك حاجة ولا ذكرى خاصة ولا مناسبة عشت فيها ولا هو اليوم اللي حبيتوا بعض فيه ولا اتخطبتوا فيه ولا اتجوزتوا فيه ولا هو اي معنى…!
الحب مش مناسبة او عطلة رسمية في يوم وخلص .. الحب عمر ومشاعر وأحاسيس لا بتنتهي ولا ليها حدود ولا بتقف عند حد معين لأنها حياة عايشه في القلب بتتنفس معاه وتعيش جواه …!
الحب هو اللي بيصنع ذكرياتكم الخاصة ويصنع الضحكة الحلوى بينكم والسعادة اللي ملهاش نهاية فيكم بيصنع جواكم الحنين والعشق والاشتياق كل لحظة بتفوت عليكم من غير ما تشوفوا بعض او تسمعوا صوت بعض هو الخوف والأمان..!
الحب الحقيقي هو السند والقوة والأحترام والأمل والعطاء والدفئ والحنين.. هو امتلاك للقلب والروح جو شخصين ليتحول لشخص واحد بيعيش بنفس النبض لو واحد منكم اتوجع التاني بيصرخ عنه من الألم…!
الحب الكلام عنه ملوش معنى يقدر يوصفه ولا احساس ممكن يرسمه ولا مشاعر تقدر ما تبكيش من حلوته جوه القلب او لما تشوف عين حبيبك قدامك…!
الحب يا جماعة حاجة كدة ربنا خلقها لينا علشان نقرب من بعض وهو رزق لما يتكتبلك بتملك الحياة والسعادة..!
الحب هو أنتي وانت… هو انتوا… هو الحاجة اللي ملهاش وصف بس في عينك بتبان…!
عرفتوا عيد الحب الحقيقي إيه وفين جواكم وإزاي تحتفلوا بيه لنفسكم وبس.. وتصنعوا لنفسكم مناسبة ليكم محدش يشاركم فيها غير قلوبكم وحبكم…!
أحبائي اتمنى السعادة والفرح والحب الحقيقي يملاء قلبكم.. حب يكون الحياة والحصن والأمان من شر الأنس والجان …!
