أنا العاشق أنا المُغرَم

بقلم مصطفى سبتة
أنا العاشق أنا المُغرَم
شَكلي أنا اتخطفت
ومالي ايُها حيلة
أيا اميرة ياجميلَة
حبَّه عليهالفظ جميلة
كان قلبي ضاع
مُفتاحه من سنوات
إزاي دخَلتي ياروحي
وانتي ليه بالذات
حبيبتي رممَّتي كل
اللي انكسر فيَّا
ووضعتي فيَّا ياقلبي
قِوة للجايات والجايات
‏ضَل الجميع السِكة
وانتي ياروحي وصِلتي
غربَلت كل الخلق
وانتي ياقلبي فضِلتي
مفعول -بَحِّبك-بَحِّبك-
يا حبيبتي أصبح بطِئ
نِفسي اخترِعلِك ياقلبي
كِلمة تانية تليق
شُفتِك صابتني الدهشه
قُلت أنا على طول “الله ”
وصبَحتي دعوَه ثابتَه
ادعيها أنا في كُل صلاة
حُبِك ياروحي قانون
خَد فيَّا فوق مَجراه ..
دستُور وقانون بنُوده
كُلها وكلها ” ضحكتِك ”
ببصُم عليه يانور عيني
كل ما اشُوف طلتِك
ما اعظم الورد والفل
لو جايلِك ف ايدي
ما اجمَل العالم بحنيتِك
رغم انِك طَولتي عليا
كان عندي يقين انِك جَيه
بُصي على اللهفَة ياقلبي
اللي ف قلبي وروحي
بُصي على العالَم بعنيا
هتلقِي اني ياحبيبتي
وهَبتِك كُل ماتُملك ايدَيا
“وانْ اللي ليكِي ف قَلبي
عُمره ما كَان شويَه
تخاصميني ياحبيبتي
يخاصِمني النُوم
تصالحيني ياحياتي
يخاصِمني الحُزن
تشوفِك روحي ياقلبي
قبل عنَيا أحياناً
وقلبي الغالي يصبَح
ليكي ياعقلي “مَجانا”
يا صَبيه واخدَه مِني،
صوتي لو فكَّرت اغنِّي
دعوِتي وقت التَمني
بحكي عنِّك فاحكِي عنِي
يا اللي ساكنَه حُسن ظني
يا ام فُستان طَار فتني
لمِي طيفِك من طريقِي
يا اللي قُربك فَك ضِيقي
قَبل مِنك عَطشي طَول
لمَا كان صَبري صديقِي
لمَّا جيتي انتي لقيت
القَدر بيبِل ريقي
يا اللي لمَّا تبقي مِلكي
هو ده العُمر الحقيقِي
ساكتَه لياهاتي عُمري
آمضي بحبك عَليه
‏يااللي حُضنِك فَن
ماتصَنفش نوعُه
يا اللي حُبِّك علم
ما قالِتهوش دراسَة
عَندي ما يُثبت بإني
جنايني وعاشق شاطِر
هاتي ما يُثبت بإنِك مش
اميرة ياجميلَة و فراشة
حِصنِك ياحبيبتي ف
قلبي اذا يوم خُفتي ساتِر
أنا جيشِك لوكنتى خايفه
واشعاري ليكي عساكِر
أنا اللي حلِفت ما هفارِق
وعَند يميني للآخر
يشهَد المولى عليا ان
أفضل طول العُمرصابِر
لجل اقابلِك لجل ابادلِك
عندي ما يِثبتلِك اني
بعِيش وهاعيش لأجلك
وان شغلانتي الجديدة
تضحَكي فاكتِب قصيدة
تصبَح الأحلام ف كفِنا
لو بعيدة ف عيونِك
بهجِة اسراب الفراشات
والطِيرانا ليه ملقتكِيش
من بدري انا كُنت ضرير
الصُبح بصوتك شِئ غِير
ملهُمش لزوم العصافير
مَطرح خطواتِك ما تروح
مَطرح خطواتِك ما تعود
الأرض تطلع ف ورُود
النَظره ف عينِك مجهُود
مِحتاج لثبات انا مِش قدُه
بُستان بيفوح في أوان وردُه
لو طال النَص لساعتِين
انا عاجز عن وصفِك برضُه
في قلوبنا عَمار مش متهدد
يتبَاد بصاروخ أرواحنا
أمان جداً جداً ربنا
مايجِيبش كسور وشروخ
جوايا القِوة اني حارب
جيش من الأساطِيل
رغم اني قُصاد عينِك ببقَى
مجذوب مستسلم وقتيل
قُدامِك برمي المَنديل
تعالى احِبِك واحبِك
وابطل أبكِي وأعانِي
مبقَاش ف عُمرنا وقت
لناس غَلط تاني
تعالي نعَوض الفايت
بدون ما نعِيش
واجيبلِك م السما حِتة ومايكفيش واجيبلِك ورد
زي ما شُفت في السِيما
ورا كل شاعر يا حلوة
سندريلا جميلة عظيمة”
تعالى نفرج العالم على
القِصة مَفيش وقت تفَكري
لِسه مَا بقالنا يامآ انتِي،وانا
الليل بيستفرَد ياقلبي بنا
اليوم هناخُد م المشاعِر
حقِنا مِن غير شغَب
من غير هَرب من غير بُكا
من غير سِلاح يَكفي
ان مِن هذا التاريخ
حُضنك هيصبَح مُستباح
كفِّك هيصبَح مُستباح
يِطير الطير يا سِت الناس بجناحاتُه ويطير حبايِب
زيِّنا مِن غير جِناح